Pơndờm pơnđiang mờ nting bơr gờm chờ sa tềp kông ñân mờ cau lơh broă tàm Kông ty TNHH Huyundai Kefico gơwèt Tập đoàn Hyundai Hàn Quốc, Thủ tướng Phạm Minh Chính ưn ngài bơta tă pơgồp bơh mpồl kông ñân, cau lơh broă tàm gùt lơgar dê neh tă pơgồp tàm cồng nha bal mờ Dà lơgar dê. Mơkung đơs loh, nam 2023, Hải Dương lơh geh ală broă jàu geh ai, tàm cồng nha bal hơ̆ geh bơta tă pơgồp bơh kwang bàng, kông ñân ală mpồl lơh sa kă bro tàm ù tiah càr Hải Dương dê đơs bal mờ bơh Kông ty Kefico đơs is.

Thủ tướng jờng rơ Kông ty Kefico sền gròi kông ñân mờ kơ̆p kờñ kông ty bal mờ ală mpồl lơh sa kă bro jơh nùs lơh ngan tus bal broă lơh gàr niam rài kis mpồl bơtiàn, lơh broă di mờ adat boh lam. Thủ tướng sồr, Đảng ƀộ, gơnoar atbồ, Mặt trận Dà lơgar, ală mpồl cíñ trị càr Hải Dương dê pơn jat tai lơh niam broă lơh gàr niam rài kis mpồl bơtiàn, sền gàr tiah ơm kis, bơtàu tơnguh rài kis phan bơna, nùs nhơm bơh làng bol dê, ai bơtàu tơnguh niam chài ndrờm bal mờ bơta bơtàu tơnguh lơh sa- mpồl bơtiàn.