Tàm dơ̆ cri bơyai, Thủ tướng Cíñ phủ Phạm Minh Chính tơlik nùs nhơm chờ hờp tềng đăp bơta bơtàu tơnguh pràn kơl dang, tơl ală bơta mờ mùl màl bơh bơta git gơ̆p lơh broă bal lơh bơyô đah lơgar Việt Nam mờ lơgar Nhờk. Jăt mờ hơ̆, lơgar Nhờk là lơgar lơh broă sồ 1 bè ODA, dơ̆ bàr bè lơh broă, dơ̆ pe bè bơcri priă mờ dơ̆ poan bè kă bro; ai tơngŏ lơgar Việt Nam sùm sền lơgar Nhờk là lơgar tam klăc lơh broă bal kwơ màng ngan mờ jŏ jòng.

Thủ tướng Cíñ phủ Phạm Minh Chính sồr Củ tịc Hạ viện lơgar Nhờk Nukaga Fukushiro mờ Hạ viện lơgar Nhờk sền gròi, kờñ bal tơnguh bơta git gơ̆p lơh broă bal uă bơta đah lơgar Việt Nam mờ lơgar Nhờk jăt bơta git gơ̆p pa Tam klăc bal jŏ jòng tơl ală bơta, tơnguh lơh broă bal, tìp bal Quốk hội bàr lơgar, tơnguh broă tàm pơgơl mpồl kwang bàng kấp dờng, tìp bal đah ală Nghị sỹ, Nghị sỹ kơnòm să, cau ùr Nghị sỹ bàr lơgar. Kờñ bal mờ lơh pràn broă yal tơngit bàr gah lơh sa, dong kờl lơgar Việt Nam bơ̆t bơtàu broă lơh sa krơi is, lơh is.