Ală jơnau yal tàm pơrjum pà gĭt, tàm 11 nhai nam do, khà ai priă bơcri dà lơgar jơh gùt lơgar lơh geh pơgap 461 rơbô tơmàn đong, lơh geh 65,1%, uă rlau 6,77% pơndrờm bal dùl tŭ mờ nam lài mờ khà ngan ngồn jơnhoa rlau pơndrờm bal dùl tŭ mờ nam lài rlau 122 tơmàn 600 tơlak đong. Bulah khà ai priă bơcri dà lơgar jơh gùt lơgar niam rlau pơndrờm mờ nam 2022, mơya tŭ do gam 41 Ƀộ, anih lơh broă Dà lơgar mờ 24 tiah geh khà ai priă bơcri dà lơgar lơyah rlau pơndrờm mờ khà kờp bal bơh gùt lơgar dê. Tàm pơrjum, kwang đơng lam bồ Cíñ phủ mờ ală Ƀộ, ngàñ, ală tiah đơs, bơsong broă lơh ai priă bơcri dà lơgar lơyài tài bơh bàr pe jơnau gơbàn, bè: kal ke bè broă lơh tơm priă ai ù; sră nggal bơcri priă gam kal ke; bàr pe jơnau cih adat boh lam tàm rơndăp rơndồl, ndrờm bal pa geh tam gơl wơl...

 Đơs pơndŭt pơrjum, Thủ tướng Phạm Minh Chính đơs lah kràñ ngan ală Ƀộ, anih lơh broă, ală tiah geh khà ai priă bơcri dà lơgar ờ uă; sồr ală anih lơh broă, ală tiah jơh nùs sền tìs di is nàng ai bơta mờng chài lơh broă, jat tàm hơ̆ pal kràñ cê jơh nùs lam lơh ală broă lơh nàng lơh niam broă ai priă bơcri dà lơgar tàm anih lơh broă, ală tiah he dê mhar mờ geh cồng nha.