Thủ tướng đơs nền, pơrjum do nàng kờñ tă bơsong kal ke bè priă càn ai rài lơh sa in, den tàng bol he pal iat jơnau đơs bơh ală cau tờm geh gơ rềng dê dùl bă git ki ngàm, geh bơta sền gròi; sồr ală kwang bàng geh jơnau đơs song dơpă, đơs song tàm bơta geh ngan, đơs ală broă gơtùi lam lơh ngan ngồn, di tŭ, geh cồng nha, ơn bơta kuơ dà lơgar, jơi bơtiàn, ală ngân hàng, mpồl lơh sa kă bro lài ngan. Thủ tướng đơs loh, bơta ngân hàng geh gơ rềng tus mpồl lơh sa kă bro, mpồl lơh sa kă bro mờ ngân hàng geh gơ rềng tus rài lơh sa dà lơgar. Rài lơh sa geh bơtàu tơnguh den ngân hàng mờ mpồl lơh sa kă bro hơ̆ sồng bơtàu tơnguh mờ sơ lơ̆u wơl, ngân hàng mờ mpồl lơh sa kă bro bơtàu tơnguh den dà lơgar hơ̆ sồng bơtàu tơnguh. Thủ tướng đơs nền, pal jòi geh broă lơh ai bơta càn priă tài gam geh càn priă ờ gơtùi, geh priă mơya ờ hềt gơtùi tă dơ̆ ngui, pal cribơyai jat nùs nhơm song dơpă, ki ngàm, git iat mờ git cih dờp.