Tơnơ̆ mờ tŭ neh iăt ală jơnau đơs cri bơyai bơh kwang đơng lam ală ƀộ, gah lơh broă dà lơgar bal mờ ală càr ƀòn dờng dê, Thủ tướng Phạm Minh Chính dờp, pơn jờng, đơs niam ală broă lơh ngan mờ cồng nha neh lơh geh bơh ală ƀộ, gah lơh broă dà lơgar, ală càr ƀòn dờng dê; broă đơng lam pràn bơh ală kwang bàng tàm Mpồl đơng lam lơh niam wơl sră nggal tàm tơngai do; geh uă broă pơgồp bal niam, kwơ màng tàm cồng nha bal bơh gùt lơgar dê.

Thủ tướng hòi jà, ală ƀộ, gah lơh broă dà lơgar, ală càr ƀòn dờng pơn jăt tai sền wơl, tam gơl pa gùng dà broă lơh, broă lơh mờ ngui gơnoar, kơnòl broă bơh cau lam bồ nàng bơyai lơh geh cồng nha kơnòl broă Lơh niam wơl sră nggal geh jào. Kwang đơng lam ƀộ, gah lơh broă dà lơgar, ală càr, ƀòn dờng tơnguh broă cri bơyai nàng git bơta tàm mùl màl mờ đơng lam bơsong ală bơta kal ke, gơkòl ai làng bol, mpồl lơh sa kă bro in; mhar lơh gơs, yal anih lơh broă geh gơnoar nàng ai tơlik sră nggal pal jăt, kơrnoăt sồr, nghị quyết neh geh ngui adăt boh lam dê.