Tàm pơrjum, ală kwang bàng neh cri bơyai uă bè nùs nhơm, jơnau kờñ, gùng dà broă bơtàu tơnguh bal mờ broă lơh tàm broă rơndăp ù tiah dơ̆ do. Jơnau đơs pơn dŭt tàm pơrjum, Thủ tướng Phạm Minh Chính đơs tờm, bè nùs nhơm, broă đơng lam, lam lơh broă đơng lam, pal lơh jăt, nền nòn mờ lơh nền jăt Nghị quyết Pơrjum dờng dơ̆ XIII bơh Đảng dê mờ Nghị quyết bơh Ƀộ Cíñ trị; Broă rơndăp lơh 4 nam, broă lơh jŏ jòng 10 nam bơtàu tơnguh lơh sa mpồl bơtiàn; lơh jăt Nghị quyết Pơrjum dờng Đảng ƀộ ală kấp. Thủ tướng đơs loh, pal lơh nền nòn rơlao tai gơnoar broă, bơta kwơ màng bơh Tiah do dê gơwèt mờ dà lơgar, tàm hơ̆ geh ală gah broă kwơ màng bè cíñ trị, lơh sa, bơta lơngăp lơngai, sền gàr dà lơgar, bơh tŭ hơ̆ jòi geh bơta pràn krơi is, bơta niam geh pơnrơ, bơta kwơ tàm pơrlòng. Thủ tướng đơs tờm tus mờ gơnoar broă, bơta pràn bơh tiah đah jum măt tơngai lik dà lơgar dê, tơl bơta pràn nàng bơtàu tơnguh gơs tiah tờm, tiah lam lài, broă lơh lài bè bơtàu tơnguh lơh sa mpồl bơtiàn dà lơgar dê.