Đơs tàm pơrjum, Thủ tướng Phạm Minh Chính jờng rơ uă ngan mờ jơh nùs jờng rơ ală bơta pơn đơl pràn lơh ngan, jơh nùs lơh ngan mờ cồng nha lơh geh bơh ală kấp, ală ngàñ, ngan là gơnoar broă tờm bơh mpồl Kwang àng làng bol dê, bơta tus bal, pơgồp bal niam bơh Ƀộ, ngàñ, ală tiah; bơta pơnđơl pràn lơh ngan, sơm bat tê bal lơh bal, tus bal geh cồng nha bơh mpồl lơh sa kă bro kông nghệ dê; bơta dùl nùs bal, dong kờl bal, tus bal jơh nùs bơh làng bol mờ mpồl lơh sa kă bro dê.

Tàm tơngai tus, Thủ tướng đơs loh  ală mpồl lơh kơnòl broă tờm, tàm hơ̆ sơñio loh broă lam lơh ală kơnòl broă jal mhar bơh tŭ do tus tơngai sa tềp Dà lơgar Giáp Thìn nam 2024. Ngan là, bè tă tơm priă gàr niam rài kis mpồl bơtiàn, Thủ tướng sồr Củ tịc Ủy ƀan Ñân zân 12 tiah gờñ lam lơh broă tă tơm priă gàr niam rài kis mpồl bơtiàn bơh broă lơh ờ ngui priă mat. Thủ tướng sồr, Ƀộ Tư Pháp pơgồp bal mờ Ƀộ Kwang àng lam lơh pà sră Phiếu lý lịc Tư pháp tàm ứng dụng VNeID tàm càr Thừa Thiên Huế tàm quý I/2024 nàng lơh sir broă rề ơnàng tàm gùt lơgar.