Tàm dơ̆ pơrjum, ală kwang bàng tàm Cíñ phủ neh cribơyai, sền sơ wì, ai jơnau đơs gơ wèt mờ 9 tơngume geh 7 jơnau sồr lơh adat boh lam, kơrnuat boh lam mờ 2 jơnau rơcang cih adat boh lam. Đơs pơn dut tàm pơrjum, Thủ tướng Phạm Minh Chính đơs nền, 9 tơngume ai cribơyai tàm pơrjum dơ̆ do là broă rơcang lài kuơmàng ngan ai Broă lơh lơh adat boh lam, kơrnuat boh lam nam 2024 mờ tơngai tus in. Thủ tướng cih dờp, jờng rơ ală Ƀộ: Kwang àng, Quôk phòng, Tư pháp, Xây zựng, Tài nguyên mờ Môi trường, Ngân hàng dà lơgar Việt Nam neh jơh nùs rơcang lài, yal ală jơnau sồr lơh adat boh lam, kơrnuat boh lam, ală jơnau rơcang cih adat boh lam; jơh nùs cih dờp, mblàng lơh loh nền nòn, geh bơnàng jă loh làng.

Thủ tướng jờng rơ jơnau đơs jơh nùs, geh kơnòl, di mờ bơta geh ngan mờ nùs nhơm bơt bơtàu uă bơh ală kwang bàng tàm Cíñ phủ dê mờ jơnau sồr bơh ală Ƀộ trưởng dê sồr lơh cih dờp jơh nùs, wil tơl jơnau đơs bơh kwang bàng tàm Cíñ phủ dê, lơh sir ală jơnau sồr lơh adat boh lam jat jơnau sồr.