Khà cau gơtìp chơ̆t mờ sồt să tài tơrluh ù pràn pơn jăt tai gơguh. Bal mờ dơ̆ tơrluh ù geh bơta pràn 7,6 độ richter; 155 dơ̆ mprơm tơnơ̆ mờ hơ̆ neh lơh hoàc huơr uă ngan bè tiah drà mờ lơh gơtìp uă dơ̆ ồs sa tàm ƀòn dờng Wajima, càr Ishikawa.

Đơs tàm dơ̆ pơrjum ƀăo jal mhar geh bơyai lơh tàm ngai bal, Thủ tướng lơgar Nhờk Fumio Kishida đơs nền, hoàc huơr tài tơrluh ù lơh sa là “tàm bơta uă ngan”, cíñ phủ lơgar do geh lơh ngan lơh mhar ală broă dong kờl mờ dong klàs cau gơtìp rềs àr “tơl ală bơta”, tàm tơngu me hòi jà jơh ală mpồl lơh broă, mờ ai kwang đơng lam ală ƀộ, anih lơh broă gơrềng bal tus tàm tiah gơtìp aniai nàng dong kờl pơn diang ntrờn phan mờ ală broă lơh dong kờl ndai.