Dờp jơnau jà bơh Cíñ phủ Ală lơgar dềt tơrgùm dùl (UAE) mờ Cíñ phủ lơgar Kộng hòa Thổ Nhĩ Kỳ dê, mho ngai 28/11, Thủ tướng Cíñ phủ Phạm Minh Chính mờ Pơ ùr bal mờ mpồl kwang bàng kâp dờng lơgar Việt Nam neh lòt pơrjum kwang bàng kâp dờng Lơh broă nhơm trồ tiah dunia tàm Pơrjum dơ̆ 28 ală gah tus bal Kông ươk bơh Liên hợp quôk dê bè Tam gơl nhơm trồ tiah (COP28), bơyai lơh 2, 3 broă lơh 2 gah tàm UAE mờ còp ngan ngồn lơgar Thổ Nhĩ Kỳ bơh ngai 29/11 tus ngai 03/12/2023.

Pơrjum kwang bàng kâp dờng Lơh broă nhơm trồ tiah dunia geh lơh tàm Pơrjum COP28 là broă uă lơgar kuơmàng ngan rlau jơh tàm nam bè tam gơl nhơm trồ tiah. Pơrjum kwang bàng kâp dờng kờp dŭ geh bơta tus bal bơh rlau 70 rbô nă kwang bàng tus bơh 197 lơgar, EU mờ git nđờ rbô mpồl lơh broă ờ di cíñ phủ, mpồl lơh sa kă bro, mpồl ơruh pơnu mờ ală gah geh gơ rềng ndai. Kuơmàng, geh bơta geh mat bơh rlau 100 nă kwang atbồ lơgar, Thủ tướng Cíñ phủ ală lơgar mờ kwang đơng lam bồ ală mpồl lơh broă dunia. Thủ tướng Phạm Minh Chính tus bal Pơrjum kwang bàng kâp dờng lơh broă nhơm trồ tiah dunia là dơ̆ nàng Việt Nam ai tơnggŏ pràn kơldang ngan jơnau đơs kờñ pơyua geh kơnòl, rơcang lài, jơh nùs tàm broă tus bal bơsong ală bơta lòng bal gùt plai ù bè tam gơl nhơm trồ tiah; dong mpồl bơtiàn dunia git loh rlau tai bè gùng dà, bơta lơh ngan mờ bơta pơn đơl pràn kung bè ală kal ke, bơta lòng bơh Việt Nam dê tàm broă rơcang sơndră mờ tam gơl nhơm trồ tiah.