Tŭ do, Việt Nam neh geh mờr 900 rbô mpồl lơh sa kă bro gam lơh broă, mờr 14 rbô 400 hợp ták xã mờ rlau 5 tơlak hìu bơnhă kă bro. Ală mpồl lơh sa kă bro tă pơgồp rlau 60% GDP, mờr 30% kờp jơh khà cau lơh broă gam lơh broă. Bơdìh mờ broă lơh sa kă bro, mpồl cau lơh sa kă bro kung sùm ai tơnggŏ kơnòl mờ mpồl bơtiàn, uă cau lơh sa kă bro neh mờ gam jơh nùs tus bal ală broă lơh tơn jơh jơgloh tơrmù rƀah, kis git jơnau git adat.

Đơs tàm dơ̆ tìp mat, Thủ tướng Phạm Minh Chính neh pơyua jơnau lùp còp, kah ưn ngài, jơnau nting bơr gờm chờ niam bơnĕ ngan rlau jơh bơh Tổng Ƀí thư ồng Nguyễn Phú Trọng dê tus jơh gùt mpồl cau lơh sa kă bro, mpồl lơh sa kă bro Việt Nam. Thủ tướng Cíñ phủ đơs nền, pơn jat tai lòt bal mờ ală mpồl lơh sa kă bro. Pơn jat tai gàr kơ̆ kơljap broă lơh sa dờng, gròi sền bơta roh giă priă, sơlơ chồl pràn gơguh lơh sa, gàr kơ̆ kơljap ală jơnau tàm pơn ring dờng bơh rài lơh sa dê. Pơn jat tai chồl pràn tam gơl niam anih bơcri priă kă bro ring bal, niam, ndrờm bal mờ loh làng; sang tĕ ală bơta kòl yan, ală jơnau cih bè ală bơta pal geh kă bro ờ duh pal geh, tơnguh pràn jak tàm pơrlòng dà lơgar, sơlơ chồl pràn tam gơl wơl sră pơ àr gơnoar atbồ, bơt bơtàu rài lơh sa sồ, Cíñ phủ sồ tam gơl pa, rềp mềr mờ làng bol mờ mpồl lơh sa kă bro.