Đơs tàm dơ̆ tìp măt, Thủ tướng Phạm Minh Chính pơyoa jơnau chờ gờm niam bơnĕ ngan bơh Tổng Ƀí thư Nguyễn Phú Trọng dê tus mờ ală cau pơgru gŏ măt tàm dơ̆ tìp ngai do mờ pơyoa tus ală rơnàng cau pơgru tàm gùt lơgar jơnau còp să đềt mềr mờ jơnau chờ gờm niam bơnĕ ngan.

Lơh jăt Nghị quyết Pơrjum dờng dơ̆ XIII bơh Đảng mờ Nghị quyết sồ 29 bơh Dà lơgar dê, Thủ tướng hòi jà gah bơto mờ bơsram pal pơn jăt tai lơh jăt nền nòn, ndrờm bal, geh cồng nha ală kơnòl broă, broă lơh tam gơl pa tờm ngan, tơl ală bơta broă bơto mờ bơsram, tơnguh uă bơta niam broă bơto tàm jơh ală kấp bơsram. Thủ tướng kơ̆p kờñ mờ pin dờn là, tơl nă cau pơgru geh pơn jăt tai lơh ngan, sùm là cau lam lài bè broă bơsram tàp nùs nhơm-bơsram tàp bơta chài, gơboh mờ broă lơh – gơboh mờ kòn bơnus; tơnguh uă bơta ngăc ngar broă bơto, geh broă lơh pa tàm broă bơto mờ bơsram; nàng tơl dơ̆ bơsram mùl màl geh kwơ mờ niam bơnĕ, nàng pah ngai lòt bơsram mùl màl là ngai chờ.