Drim ngai 29/11, jat jiơ tiah do, dơ̆ wă rò ngan ngồn Thủ tướng Cíñ phủ Phạm Minh Chính neh geh bơyai lơh yŭ rơyùm tàm Gơlang Kwang atbồ lơgar Thổ Nhĩ Kỳ bơh Phó Kwang atbồ lơgar Nhổ Nhĩ Kỳ Cevdet Zilmaz đơng lam. Tơnơ̆ hơ̆, Thủ tướng Cíñ phủ Phạm Minh Chính neh tìp mat mờ Phó Kwang atbồ lơgar Thổ Nhĩ Kỳ Cevdet Zilmaz.

 Tàm dơ̆ tìp mat, 2 gah neh yal bal mờ gơ̆p bè bơta lơh sa, cíñ trị- mpồl bơtiàn tàm tơl lơgar mờ cribơyai bè ală broă dunia mờ tàm tiah do dê sền gròi bal. 2 nă kwang đơng lam bồ đơs nền kơ̆p kờñ mờ jơh nùs lơh ngan chồl tơnguh rlau tai bơta gĭt gơ̆p lơh bơyô bal mờ lơh broă bal uă gah đah lơgar Việt Nam mờ Thổ Nhĩ Kỳ tài bơta kwơ bal bơh làng bol 2 lơgar dê, tài bơta ring bal, kơ̆ kơl jăp mờ bơtàu tơnguh tàm 2 tiah do mờ tàm dunia. 2 nă kwang đơng lam bồ ring bal pal pơn jat tai bơt bơtàu mờ chồl tơnguh rlau tai bơta gĭt gơ̆p cíñ trị- cribơyai broă mờ lơgar ndai niam bơnĕ bơh broă sơlơ tơnguh rlau tai broă lơh tàm pơ gơl mpồl kwang bàng ală kấp lòt còp bal mờ gơ̆p, ngan là ală ală mpồl kwang bàng kấp dờng.