Cribơyai bơh Ƀộ Kế hoạc mờ Đầu tư, Đại sứ quán lơgar Việt Nam tàm lơgar Thổ Nhĩ Kỳ mờ Mpồl duh broă lơh sa lơh broă mờ lơgar ndai lơgar Thổ Nhĩ Kỳ dê pơgồp bal bơyai lơh. Tàm dơ̆ Cribơyai, ală mpồl lơh sa kă bro lơgar Việt Nam mờ Thổ Nhĩ Kỳ dê geh yal tơngĭt bè bơta pràn, jơnau kờñ lơh broă bal bơcri priă, lơh sa kă bro bơh tơl gah dê; tam pà bal jơnau bơsram lơh geh cồng nha tàm broă lơh broă bal, bơcri priă.

Đơs tàm dơ̆ Cribơyai, Thủ tướng Cíñ phủ Phạm Minh Chính pà gĭt: Lơgar Việt Nam gam tơrgùm tàm 3 broă bơtàu tơnguh pràn, kơ̆ kờñ lơh broă bal tàm ală gah broă lơh lơh sa sồ, tam gơl tơlir, lơh sa tàm pơdar, lơh sa bồ tơngoh ngăc ngar, lơh sa tam pà bal; ai bơta jak chài măy mok, tam gơl pa bơceh lơh là bơta gơn kơnờm bơtàu tơnguh pa. Lơgar Việt Nam ai tơl bơta niam ngan rlau jơh ai ală mpồl lơh sa kă bro dờng, măy mok pa, geh mờng chài ătbồ, tàm hơ̆ geh mpồl lơh sa kă bro lơgar Thổ Nhĩ Kỳ tàm broă bơcri priă, lơh sa kă bro tàm lơgar Việt Nam.

Kung tàm ngai 30/11 sơl, Thủ tướng Cíñ phủ Phạm Minh Chính wă rò Ƀộ trưởng Kes priă mờ Priă jền mờ Ƀộ trưởng Ƀộ Lơh sa mờ măy mok mờ Măy mok lơgar Thổ Nhĩ Kỳ dê mờ lòt còp, lơh broă mờ Tập đoàn Gah rơndeh par Hơđang kơlwàng trồ lơgar Thổ Nhĩ Kỳ dê, do là dùl tàm ală tập đoàn lơh sa mờ măy mok sền gàr dà lơgar khà dùl lơgar Thổ Nhĩ Kỳ dê; lòt còp Ƀảo tàng Anatolia, lơgar Thổ Nhĩ Kỳ.