Yal mờ Thủ tướng Phạm Minh Chính mờ mpồl kwang bàng tŭ lòt còp, sền sơ wì tàm Anih rơndeh ồs ơm Hà Nội, Kwang atbồ dờng Tổng Kông ty Gùng rơndeh ồs Việt Nam ồng Hoàng Gia Khánh pà git, nam 2023, gah gùng rơndeh ồs Việt Nam đơs bal mờ Tổng Kông ty Gùng rơndeh ồs đơs is neh sơrlèt gan uă kal ke, kòl yan, lơh geh 2, 3 cồng nha kuơmàng ngan. Priă lơh geh jơh gùt Tổng Kông ty dê geh 101,7%, priă cồng lơh geh tơnơ̆ tă dia geh 115% broă rơndap lơh, gàr niam rơndap tap sèng lơngăp lơngai lòt rê tàm gùng rơndeh ồs gơmù jơh 3 bơta.

Thủ tướng Phạm Minh Chính đơs, bơh lòt sền ngan ngồn tàm Anih rơndeh ồs ơm Hà Nội chờ hờp ngan tŭ nac đơs gah gùng rơndeh ồs Việt Nam neh tơnguh bơta niam broă drơng ala, tơngkah Tổng Kông ty ờ gŏ di sền ờ sơp, pal pơn đơl pràn rlau tai rơp geh cồng nha niam rlau tai. Bè gùng dà ai tơlik lài bơtàu tơnguh gùng lòt pơndiang phan gùng rơndeh ồs Việt Nam, sền gròi tus bơt bơtàu bơnàng jă bơtàu tơnguh lơh mờ măi mok gùng rơndeh ồs jat gùng dà tam gơl pa; mhar lam lơh geh cồng nha Broă rơndap lơh bơtàu tơnguh, Broă rơndap lơh lơh sa kă bro mờ bơcri priă bơtàu tơnguh tơngai bơh nam 2021 tus nam 2025 neh geh ring bal.