Tơnơ̆ tŭ iăt ală jơnau đơs cribơyai, đơs tàm Pơrjum, Thủ tướng Phạm Minh Chính pà gĭt bè tơngai mờ cồng nha pơn rơ ngan bơh nam 2023 bơh jơh gùt lơgar dê mơkung sơñio loh ală cồng nha neh lơh geh bơh Gah Niam chài, Tàp pràn să jan mờ Lòt  nhơl dê tàm hơ̆ đơs sùm, gah Niam chài, Tàp pràn să jan mờ Lòt nhơl neh bal mờ ală kấp, ală ngàñ, ală tiah pơn jat tai tam gơl pràn kơl dang nùs nhơm kơlôi sơnơng “lơh niam chài” tus “Atbồ Dà lơgar bè niam chài”, pơnđơl pràn lơh ngan bơsong bơta kal ke, kòl yan; jơh nùs, rcang lài ngui tŭ tơngai niam, bơta ƀuơn, lam lơh kràñ cê jơh nùs, dùl ròt bal ală kơnòl broă, broă lơh mờ lơh geh uă cồng nha pơn rơ ngan.

Bè gùng dà broă lơh, kơnòl broă nam 2024 mờ tàm tơngai tus Thủ tướng sồr gah Niam chài, Tàp pràn să jan mờ Lòt nhơl pal pơn jat tai tơrgùm lam lơh jat geh cồng nha ală gùng dà broă lơh, adat boh lam bơh Đảng, Dà lơgar dê bè niam chài, ngan là Jơnau đơs pơndŭt bơh Tổng Ƀí thư Nguyễn Phú Trọng dê tàm pơrjum Niam chài jơh gùt lơgar.