Pơrjum do nàng kờñ pơn jat tai lơh gơs ngan ngồn ală gùng dà broă lơh bơh Đảng, Dà lơgar dê bè bơtàu tơnguh tiah Ring dà dờng Hồng, kơnhoàl ù tiah tờm lơh sa tiah đah tô Dà lơgar dê, kơnhoàl ù tiah càr lơgar mờ càr Hải Dương, ngan là Nghị quyết bơh Ƀộ Cíñ trị dê bè gùng dà broă lơh bơtàu tơnguh lơh sa mpồl bơtiàn, gàr niam sền gàr Dà lơgar, lơngăp lơngai tiah Ring dà dờng Hồng tus nam 2030, rơndăp broă tus nam 2045.

Đơs tàm pơrjum, Thủ tướng Phạm Minh Chính đơs sùm, càr Hải Dương tơrgùm uă ngan bơta ƀuơn, bơta pràn krơi is, tŭ tơngai niam pơn rơ ngan, bơta ƀuơn tàm pơrlòng nàng bơtàu tơnguh lơh sa mpồl bơtiàn mhar mờ kơ̆ kơl jap, là tiah tus gơ kờñ ngan gơwèt mờ ală cau bơcri priă tàm lơgar mờ dunia dê, lơh geh bơta gơn kơnờm bơtàu tơnguh ai càr Hải Dương in mờ lơh gơrề uă ai kơnhoàl ù tiah Ring dà dờng Hồng mờ jơh gùt lơgar. Bal mờ hơ̆ Thủ tướng sồr, lơh pràn tam gơl rơndăp tăp sèng lơh sa, pơgồp bal mờ tam gơl pa broă lơh gơguh lơh sa, tơnguh uă cồng nha lơh geh mờ bơta pràn jak tàm pơrlòng, jat tàm bơnàng jă tam gơl sồ, khoa họk kông nghệ mờ tam gơl bơceh lơh, bơtàu tơnguh lơh sa tơlir, lơh sa tàm pơdar.