Yal mờ Củ tịc Quôk hội Bulgaria bè ală bơta bơnàng jă bơt bơtàu dà lơgar, gùng dà lơh broă mờ lơgar ndai, broă lơh sền gàr dà lơgar kung bè ală cồng nha bơtàu tơnguh lơh sa- mpồl bơtiàn bơh lơgar Việt Nam dê, Thủ tướng Cíñ phủ Phạm Minh Chínhd dơs là, bàr gah pal sơlơ tơnguh tai lơh broă bal mờ kơp kờñ ngai sơlơ geh uă rlau tai ală mpồl lơh sa kă bro, cau bơcri priă bơh lơgar Việt Nam mờ lơgar Bulagria dê bơcri priă tàm tơl lơgar. Thủ tướng Phạm Minh Chính sồr bàr gah git nền lơh broă bal lơh sa mờ gah tờm ngan tàm bơta git gơp 2 lơgar, pal sơlơ tơnguh tai bơta git gơp kă bro 2 gah nàng gờñ lơh geh 500 tơlak dolar Mỹ pah nam.

Di dơ̆ do, Thủ tướng Phạm Minh Chính ưn ngài lơgar Bulgaria neh dong bơto bơtê git nđờ jơt rbô nă kwang bàng, cau bơsram dờng, cau kơlôi sơnơng Việt Nam, tàm hơ̆ geh uă kwang bàng kâp dờng lơgar Việt Nam; sồr 2 gah kơlôi sơnơng ală bơta pràn, lơh broă bal bơto bơtê pa nàng gơ hòi gơ jà ală cau bơsram dờng, cau kơlôi sơnơng 2 lơgar bơsram tàm ală hìu bơsram, anih bơto bơtê bơh tơl lơgar dê tàm ală gah broă mờ 2 gah geh bơta pràn.