Tàm dơ̆ wă, Thủ tướng hòi jà Cíñ phủ, Ƀộ Quốk phòng bàr lơgar pơn jăt tai lơh mùl màl jơh mờ lơh geh cồng nha ală Hiệp ướk, Hiệp định, Jơnau ring bal mờ Jơnau đơs pơn dŭt đah Kwang đơng lam kấp dờng bàr Đảng, bàr dà lơgar, pơgồp bal tàm broă bơ̆t bơtàu, tơnguh nùs nhơm git gơ̆p lơh bơyô kwơ màng đah lơgar Việt Nam mờ lơgar Campuchia.

Hòi jà bàr gah lơh pràn broă lơh bal tàm jơh ală gah broă, tàm hơ̆ geh kă bro, bơcri priă, tơrbŏ bal bàr gah lơh sa, phan bơna gùng lòt, bơto bơtê cau lơh broă, tìp bal làng bol. Thủ tướng kơ̆p kờñ ling klàng pe lơgar Việt Nam-Lào-Campuchia pơn jăt tai tam klăc bal, ring bal, lơh broă bal nền nòn tàm nùs nhơm pin dờn, song dơ pă, geh cồng nha; pơgồp bal bơ̆t bơtàu gùng nhàr dà lơgar ring lơngai, lơh bơyô, lơh broă bal mờ bơtàu tơnguh.