Thủ tướng Cíñ phủ pà gĭt, lơgar Việt Nam sùm sền gròi gĭt gơ̆p lơh bơyô bal ờs mờng bơh yau mờ lơgar Romania; jờng rơ lơgar Romania neh tò dong mờ dong kờl lơgar Việt Nam tàm dơ̆ tam lơh ai geh lơngăp lơngai is, tơrgùm dùl dà lơgar lài do kung bè bơ̆t bơtàu mờ bơtàu tơnguh dà lơgar ngai do.

Thủ tướng Phạm Minh Chính mờ Ƀộ trưởng Ƀộ Lơh sa, Mpồl lơh sa kă bro mờ Lòt nhơl lơgar Romania Stefan Radu Oprea chờ hờp pà gŏ gĭt gơ̆p 2 gah đah lơgar Việt Nam- Romania gam bơtàu tơnguh niam bơnĕ tàm uă bơta cíñ trị, cribơyai broă mờ lơgar ndai, lơh sa, lơngăp lơngai, sền gàr dà lơgar, niam chài, bơto bơtê.

Tơngai tus, bal mờ sơlơ tàm pơgơl mpồl kwang bàng kâp dờng mờ ală kâp lòt còp bal mờ gơ̆p, tàm jơh ală gah, Thủ tướng Phạm Minh Chính sồr 2 gah gĭt nền lơh broă bal lơh sa- bơcri priă- kă bro là broă tờm kwơmàng tàm gĭt gơ̆p 2 gah tàm tơngai tus, ndrờm pal mờ gĭt gơ̆p cíñ trị, cribơyai broă mờ lơgar ndai. 2 gah pal sơlơ tàm tơrbŏ bal jun pơndiang phan, tàm hơ̆ geh jun pơndiang phan gah rơndeh par; ngui geh cồng nha Hiệp địñ EVFTA.