Bơh bồ nam 2023 tus tŭ do gùt lơgar gơlik geh mờr 3 rơbô dơ̆ ồs sa mờ bơta rềs àr ồs sa, lơh chơ̆t 134 nă cau, lơh sồt să 101 nă cau, bè phan bơna kờp dŭ lài bơh chờm kờp mờ priă mờr 230 tơmàn đong.

Đơs pơndŭt pơrjum, Thủ tướng Cíñ phủ ồng Phạm Minh Chính jờng rơ uă ngan bơta pơnđơl pràn lơh ngan, cồng nha mờ ală Ƀộ, ngàñ, ală tiah, ală mpồl lơh broă geh gơnoar dê neh lơh geh tàm broă lơh rcang sơndră mờ crùh ồs sa mờ dong kờl cau gơtìp rềs àr tàm tơngai pa do, neh tă pơgồp lơh geh tiah ơm kis lơngăp lơngai, bơta ring lơngai, ai rài kis in. Bal mờ hơ̆, Thủ tướng Cíñ phủ sồr pal jơh nùs sền swì broă lơh rcang sơndră mờ crùh ồs sa mờ dong kờl rềs àr, gam uă bơta gơkòl, ờ hềt di pal, pal sơbăc mhar, nền cê jơh nùs bơsong. Thủ tướng sơñio loh, broă đơng lam, sồr lơh, lơh jat broă lơh rcang sơndră ồs sa mờ crùh ồs sa mờ dong kờl rềs àr geh tiah ờ hềt lơh geh cồng nha. Thủ tướng sồr ală Ƀộ trưởng, Kwang đơng lam bồ anih lơh broă ndrờm mờ Ƀộ, Củ tịc Ủy ƀan Ñân zân ală càr, ƀòn dờng jơh nùs ai bơta mờng chài lơh broă, lơh niam wơl tàm broă đơng lam, sồr lơh broă lơh rcang sơndră ồs sa mờ crùh ồs sa mờ dong kờl rềs àr.