Kông điện đơs loh: Jat jơnau yal mhar bơh Ủy ƀan Lơngăp lơngai lòt rê tàm gùng Dà lơgar dê, tàm tŭ 02 jiơ 10 phuk àng drim gờñ ngai 31 nhai 10 nam 2023, tàm kơi sồ 70+800 Gùng rơndeh dờng 1A gơwèt kơh Rừng Cấm, kơnhoàl Hữu Lũng, càr Lạng Sơn neh gơlik geh dơ̆ rềs àr gùng lòt kơn jơ̆ ngan đah rơndeh ôtô năc 16 cơ ghĕ geh ƀàng sồ 14B-03657 tam tơm mờ rơndeh sơ mi rơ moóc mờ rơndeh container lòt gùng sơlơ̆u wơl; jơnau gơ lời wơl lơh 5 nă cau chơ̆t mờ uă cau ndai sồt să, 3 rơndeh ôtô ờ diơng kơn jơ̆ ngan.

Tơnơ̆ tŭ dờp geh jơnau yal bè dơ̆ rềs àr, Thủ tướng Cíñ phủ neh sồr pơyoa jơnau lùp còp, tam pà bal bơta muăt jrùm uă ngan tus mờ cau pròc mhàm, hìu bơnhă ală cau gơtìp chơ̆t, pơndờm pơnđiang, lùp còp ală cau sồt să tàm dơ̆ rềs àr; mơkung jàu kơnòl broă ai Phó Củ tịc ờs drơng kơnòl broă Ủy ƀan Lơngăp lơngai gùng lòt Dà lơgar in bal mờ ală kwang bàng ala mat Ƀộ Kwang àng, Ƀộ giao thông Vận tải tus tơn tàm tiah gơlik geh rềs àr nàng pơgồp bal mờ Ủy ƀan Ñân zân càr Lạng Sơn mờ ală anih lơh broă geh gơrềng đơng lam bơsong jơnau gơ lời wơl mờ lùp còp ală cau gơtìp rềs àr tàm dơ̆ rềs àr; tơrgùm uă ngan rlau jơh mpồl dong kờl ală cau sồt să; lam lùp còp, dong kờl di tŭ, pơndờm pơnđiang hìu bơnhă ală cau rềs àr chơ̆t să mờ ală cau sồt să tàm dơ̆ rềs àr dê.