Tàm dơ̆ tìp mat, Thủ tướng chờ hờp ngan còp ngan ngồn lơgar Singapore tàm gơnoar broă Thủ tướng Cíñ phủ Việt Nam mờ geh tìp mat, tơm boh bơr rềp mềr mờ làng bol Việt Nam kis tàm lơgar do mờ kwang bàng, cau lơh broă Đại sứ quán lơgar he tàm Singapore. Thủ tướng pin dờn là, cồng nha dơ̆ lòt còp geh lơh gơlik bơta pràn pa dong chồl pràn lơh broă bal ngai sơlơ pràn kơldang, jrô ơnàng, ngan ngồn, geh cồng nha đah 2 lơgar, 2 jơi bơtiàn tàm ală gah.

Thủ tướng Cíñ phủ kung yal tơngai lơh broă mờ làng bol tàm do, ồng pà git, ngai do, ồng geh tìp mat cribơyai broă mờ tìp mat mờ Thủ tướng ồng Lý Hiển Long mờ ală kwang đơng lam bồ kâp dờng ndai bơh Singapore dê. Thủ tướng geh cribơyai broă mờ Kwang đơng lam bồ lơgar Singapore bè ală gùng dà, broă lơh ngan ngồn nàng sơlơ tơnguh bơta pin dờn cíñ trị, tơnguh bơta git gơp lơh broă bal kuơmàng bơh broă lơh niam rlau tai ală gah lơh broă bal tờm, ngan là broă lơh sa; wèt tus bơt bơtàu Bơta git gơp lơh broă bal Lơh sa sồ- Lơh sa tơlir Việt Nam mờ Singapore.

Bè 2, 3 bơta kơp kờñ, jơnau đơs, jơnau dan bơh làng bol dê, Thủ tướng jơh nùs tam pà bal, cih dờp ală jơnau đơs hơ̆ mờ geh jàu ală ƀộ, gah broă lơh dà lơgar, anih lơh broă geh gơ rềng tơrgùm jơh, kơlôi sơnơng, mhar geh broă lơh dipal, nền nòn.