Tàm pơrjum kwang bàng kấp dờng G20, Mpồl kwang bàng kấp dờng lơgar Việt Nam neh tus bal jơh ală broă lơh ngan ngồn bơh Pơrjum dê. Thủ tướng Cíñ phủ neh geh 2 jơnau đơs kwơ màng tàm ală dơ̆ cribơyai, bè “dơ̆ tam dră mờ bơta jơgloh rƀah” mờ “ bơtàu tơnguh kơ̆ kơl jăp mờ tam gơl năng lượng” bal mờ 35 dơ̆ tìp mat đah 2 gah mờ uă Kwang đơng lam bồ ală lơgar, ală mpồl ală lơgar tus bal pơrjum. Ală broă lơh uă ngan, jơh nùs, geh cồng nha bơh Thủ tướng Cíñ phủ dê neh tơngŏ loh làng rùp hin lơgar Việt Nam ngăc ngar, sơrmah sơrmài, “là bơyô, là cau lơh broă bal pin dờn mờ là lơgar tàm mpồl geh kơnòl tàm mpồl bơtiàn ală lơgar dê”.

Tàm dơ̆ lòt còp ngan ngồn lơgar Kộng hòa Dominicana, Thủ tướng Cíñ phủ ồng Phạm Minh Chính neh geh dơ̆ pơrjum bơyai kwơ màng, geh cồng nha mờ Kwang atbồ lơgar Dominicana ồng Luis Abinader Corona, bơh hơ̆, 2 gah neh ring bal Jơnau yal bơr bal đơs nền nùs nhơm jơh nùs bơh 2 Cíñ phủ dê mờ yal ală gùng dà broă lơh, broă bơsong geh 2 gah ring bal nàng kờñ sơlơ tơnguh rlau tai bơta gĭt gơ̆p tam klăc bal, lơh bơyô bal mờ lơh broă bal niam bơnĕ đah Việt Nam mờ Kộng hoà Dominicana tàm rài tơnơ̆ do.