Đơng lam dơ̆ tìp mat, Cuẩn đô đốk Nguyễn Hữu Thoan pà git: Tơngai lài, kwang bàng, cau ling mpồl tiah 5 ling dà lềng sùm dờp geh bơta sền gròi, tam pà bal, dong kờl, lòt bal bơh uă tiah, uă mpồl lơh broă tàm gùt lơgar dê. Do là bơta pơn jờng nùs nhơm dờng màng ngan nàng kwang bàng cau ling mpồl do in iang nùs lơh broă, lơh gơs niam kơnòl broă geh jàu.

Ala mat Mpồl cau ala mat 10 càr, ƀòn dờng tiah đah jum dà lơgar, Phó Củ tịc Ủy ƀan Ñân zân càr Vĩnh Long ồng Đặng Văn Chính jờng rơ cồng nha lam lơh kơnòl cíñ trị bơh Tiah 5 ling dà lềng dê, mờ kung đơs nền, ală tiah rơp pơn jat tai sơlơ tơnguh ală broă lơh wèt hờ dà lềng, bồt bơlàu ƀòn tờm mờ ală broă lơh geh kuơ ngan ngồn nàng pơn jờng kwang bàng, cau ling lam lơh niam kơnòl broă geh jàu, pơgồp bơnah sền gàr gơnoar tờm dà lềng, bồt bơlàu dờng màng bơh dà lơgar dê.