Ngai 04 nhai 07 nam 2023, Hìu sơnơm Xuyên Á Tây Nguyên neh geh mŭt lơh tàm kơnhoàl Cư̆ Jút, càr Dăk Nông. Ồng Nguyễn Văn Châu, Kwang atbồ mpồl hìu sơnơm Xuyên Á pà git, di nùs mờ bơta ñhăp nhar bơh kwang đơng lam càr Dăk Nông dê, bal mờ gŏ geh ală bơta tơngŏ niam tàm tiah bơcri priă kă bro bơh càr dê, mpồl lơh sa kă bro neh mhar lơh nền bơcri priă tàm càr do. “Tŭ do, bol añ gam tus càr Dăk Nông nàng bơcri priă dơ̆ lĕ tơn 2 hìu sơnơm: lài ngan là hìu sơnơm tàm ƀòn dờng Gia Nghĩa, mờ hìu sơnơm dơ̆ bàr là tàm kơnhoàl Cư̆ Jút. Den di lah kờp wơl broă lòt bơcri priă tàm ală càr, bơta mhar là kwơ màng ngan. Mờ kờñ mhar là pal ndrờm bal, loh làng, là pal bơsong sùm ală jơnau nàng lơh bè lơi ai cau bơcri priă in geh cồng nha mhar ngan”.

Kung đơs niam broă sền gròi bơh kwang đơng lam càr Dăk Nông dê gơwèt mờ mpồl lơh sa kă bro, ồng Hồ Tuấn Dũng, Phó Kwang atbồ dờng Kông ty bơcri priă bal 471 pà git, ală bơta gơkòl gơlik geh tàm tơngai mpồl lơh sa kă bro lơh rơndăp broă lơh niam wơl, rề ơnàng gùng bơh gùng 14 tus mpồng nhàr dà lơgar Bu Prăng ndrờm geh bơsong mhar, nàng broă lơh geh lơh gơs lài mờ tơngai geh ai. “Bè pah tŭ geh gơtìp gơkòl bè broă ù tiah, bè broă bơsong bơta chài hơ̆ sồng là ală bơta gơkòl ndai den geh broă sền gròi đơng lam nền nòn bơh ală sở, gah lơh broă, tàm hơ̆ uă ngan là mpồl atbồ ală rơndăp broă lơh, bơh kwang đơng lam càr nàng bơsong mhar ală bơta gơkòl, hơ̆ sồng geh di mờ tơngai lơh broă geh ai mờ cồng nha geh bè tŭ do”.

Bơcri priă tàm gah brê bơnơm tàm kơnhoàl Dăk Song bơh rơlao jơ̆t nam do, ồng Nguyễn Đức Hạnh, lơh broă tàm Kông ty bơcri priă bal bơta chài lơh dơm chi mờ măi mok MDF Bison Dăk Nông đơs là: “Tàm tơngai 5 nam pa do den broă sền gròi bơh gơnoar atbồ kơnhoàl, broă dong kờl bơh ală anih lơh broă geh gơnoar broă, anih lơh broă geh gơnoar bol añ gŏ là ƀuơn ngan. Den tŭ do mpồl lơh sa bol añ neh tam geh brê tàm bă ù geh càr ai mờ lơh niam broă atbồ sền gàr brê”.

Ală jơnau đơs niam bơh ală mpồl lơh sa kă bro pà gŏ tiah bơcri priă kă bro tàm càr Dăk Nông gam geh gơguh uă ngan. Bơta do neh geh gŏ bơh broă gơguh điểm càr Dăk Nông dê tàm ală khà ai gŏ was bơta pràn ală nam do. Mùl màl, sơnđio khà ai gŏ lơh niam sră nggal (PAR Index) Dăk Nông bơh lồi khà săp sèng nam 2018 neh gơguh ơm dơ̆ 37 tàm 63 càr, ƀòn dờng gùt lơgar dê nam 2022; Sơnđio khà bè broă drơng lơh bơh anih lơh broă sră nggal dà lơgar (SIPAS) săp sèng ơm dơ̆ 31 tàm 63 càr, ƀòn dờng (gơguh 16 dơ̆ pơn drờm mờ nam 2021); Sơnđio khà bơta pràn tàm pơrlòng kấp càr (PCI) ơm dơ̆ 38 tàm 63 càr, ƀòn dờng (gơguh 14 dơ̆ pơn drờm mờ nam 2021); Sơnđio khà lơh niam sră nggal gam bơ̆t bơtàu mờ tơnguh bơtàu gơnoar atbồ điện tử, gơnoar atbồ sồ ơm dơ̆ 9 tàm 63 càr, ƀòn dờng.

Geh pơnrơ ngan tàm ală sơnđio khà bơnah PCI nam 2022, càr Dăk Nông geh ală bơta gơguh pràn, bè tă priă tơngai ơm dơ̆ 6 tàm 63 càr, ƀòn dờng; bơta ndrờm bal ơm dơ̆ 17 tàm 63 càr, ƀòn dờng; bơta ñhăp ñhar bơh gơnoar atbồ càr ơm dơ̆ 23 tàm 63 càr, ƀòn dờng.

Bŭ lah bè hơ̆, jăt ồng Đậu Anh Tuấn, Phó Tổng thư ký, Kwang atbồ Ƀan pháp cề Liên đoàn kă bro mờ lơh sa mờ măi mŏk Việt Nam (VCCI) đơs, do mìng rơ̆p là dơ̆ sơnrờp nàng càr Dăk Nông tơnguh pràn kơl dang rơlao tai tiah kă bro, hòi jà bơcri priă. Tài di lah pơn drờm mờ ală càr lam lài, geh pas pràn rơlao, uă bơta ƀuơn rơlao, den broă lơh ngan sră nggal tàm càr Dăk Nông pal gơguh mhar rơlao hơ̆ sồng bơtơl geh ală bơta ờ hềt pràn càr dê. “Di lah sền tàm ală sơnđio khà PCI bơh càr Dăk Nông dê den mìng rơ̆p geh khà ai gŏ tă priă tơngai là geh tàm mpồl lam lài bơh gùt lơgar dê, gam tai den kung gam gơwèt tàm mpồl tàm gùl mờ mpồl hờ đah tơnơ̆. Den tàng càr Dăk Nông pal pơn jăt tai lơh niam rơlao tai tàm ală gah broă, bè mŭt bal tàm drà kă bro pal ƀuơn rơlao tai, broă ù tiah pal pơn jăt tai geh bơsong pràn kơl dang rơlao, hơ̆ sồng broă loh làng ndrờm bal..., den geh uă broă pal lơh mờ càr Dăk Nông pal lơh ngan tàm tơngai tus. Bơta sơn đờm lài ngan bơh càr Dăk Nông dê di gơlan ờ ƀuơn bè ală càr ndai, mơya càr Dăk Nông geh nùs nhơm kơ̆p kờñ, càr Dăk Nông geh bồ tơngoh kơlôi sơnơng mờ càr Dăk Nông geh bơta pràn lơh ngan uă, den tàng kơ̆p kờñ là bơta tam gơl tàm ală nam pa do mìng rơ̆p là dơ̆ sơn đờm lài, mờ bơta tam gơl tàm tơngai tus di gơlan pràn kơl dang rơlao, kơl jăp rơlao tai.