Bi Rơ Châm Dun, 30 sơnam, kòn cau Jarai, kis tàm ƀòn Ngol Rông, xã Ia Krêl, kơnhoàl Đức Cơ geh Kông ty 74, Ƀiñ đoàn 15 rơwah mŭt lơh kông ñân còr bơsơ̆t kao su bơh bồ nam do. Bi pà git, mờ priă nhai 7 tơlăk đong tàm 1 nhai, bi neh geh rài kis kơl jăp rơlao.

“Lài mờ tŭ mŭt lơh kông ñân den hìu añ gơtìp kal ke ngan, tŭ do geh hìu ơm, geh broă lơh den añ kung kơ̆p kờñ geh kơl jăp, tơnơ̆ do oh kòn geh lòt bơsram, añ ưn ngài kông ty neh dong kờl añ”.

Gơwèt mờ Bbi Ksor Y Đô, kis tàm xã Ia Krêl, kơnhoàl Đức Cơ dê, geh broă dong kờl bơh ală kwang bàng tàm Kông ty 75, Ƀiñ đoàn 15, tus tŭ do bi neh kơ̆ kơl jăp broă lơh mờ geh jào suơn kao su nàng còr bơsơ̆t:“Mŭt lơh broă còr bơsơ̆t kao su den geh gơguh bơta chài, iăt geh uă bơta ngăc ngar. Lài do ờ hềt geh bơsram ờ hềt git tàm broă còr bơsơ̆t, mŭt lơh broă tàm kông ty geh cau pơgru bơto bè ală gùng còr den hơ̆ sồng he git mờ gơguh chài. Bơh broă bơsram he pal git tàm broă lơh he dê, tŭ lơi kung pal rơcang mŭt lơh kông ñân nàng jòi geh tai priă ai hìu nhă in”.

Ală nam do, Kông ty 74, Kông ty 75 gơwèt Ƀiñ đoàn 15 geh lơh tàm kơnhoàl tiah nhàr dà lơgar Đức Cơ, càr Gia Lai neh bơto geh mờr 2 rơbô nă cau còr bơsơ̆t kao su là cau kòn cau kis bơh yau tàm do. Bơdìh hơ̆ tai, ală kung ty do gam lơh geh cồng nha broă lam sồr làng bol, broă rài kis lơngăp lơngai mpồl bơtiàn mờ broă jào kơnrồ nàng làng bol in ròng; “Dong kờl oh lòt bơsram” ai kơnòm dềt rơƀah in; lơh niam wơl, lơh kơl jăp wơl gùng lòt, lơh hìu nùs nhơm, hìu “Tam klăc dờng”, bơyai lơh satềp mờ làng bol, pà phan hìu cau geh sră dong kờl bơh dà lơgar in… mờ kờp jơh priă geh rơlao jơ̆t tơmàn đong. Mìng is broă ai broă lơh làng bol kis tàm do in, Đại tá Trịnh Hà Tâm, Kwang atbồ Kông ty 75, Ƀiñ đoàn 15 pà git: “Kông ty 75 nam do neh rơwah tơl cau lơh broă, 100% là cau kòn cau kis bơh yau tàm do. Tŭ geh bơto broă lơh den geh dong kờl jơh bè phan lơh broă bè bơh pềs nàng bơsram mờ bơto làng bol in git tàm broă lơh tài pal geh bơta chài uă mờ nền nòn ngan hơ̆ sồng di, den tàng, mpồl cau bơto mờ kwang bàng sùm pal bơto nền nòn mờ lơh jăt broă 3 bal mờ cau lơh broă”.

Đơs bè gơnoar bơh Ƀiñ doàn 15 dê tàm broă lơh jăt broă kòn cau tàm càr Gia Lai, ồng Trần Ngọc Phận, Phó Củ tịc UɃÑZ kơnhoàl Đức Cơ đơs: “Mpồl lơh broă bơh Ƀiñ đoàn 15 tàm do den geh ală kông ty dong kờl ai kơnhoàl in uă ngan tàm broă bơcri priă bơ̆t bơtàu phan bơna, tơm priă nhai ai kông ñân in, geh uă ngan là làng bol kòn cau. Tàm hơ̆ uă ngan là bơta lơngăp lơngai mpồl bơtiàn, geh pơgồp bal mờ kơnhoàl tàm ală broă bơ̆t bơtàu ƀòn lơgar pa, den ală kông ty lơh niam ngan. Ală broă geh tơl pràn den kông ty geh dong kờl kơnhoàl mhar ngan mờ di tŭ, ai broă lơh, priă geh bơh làng bol dê geh tơl ngui tàm rài kis”.

Đại tá Khuất Bá Cao, Ƀí thư Đảng ủy, Phó Kwang atbồ Ƀiñ đoàn 15 pà git, ai lài rơwah cau kòn cau kis bơh yau tàm do mŭt lơh kông ñân là dùl gùng dà broă lơh kwơ màng bơh Đảng ủy, Mpồl đơng lam Ƀiñ đoàn 15 dê, pơgồp bal tàm broă bơtàu tơnguh lơh sa, tơnguh uă rài kis ai làng bol in, gàr kơl jăp bơta lơngăp lơngai cíñ trị, kơl jăp mpồl bơtiàn tàm tiah nhàr dà lơgar: “Mờr 8 rơbô nă làng bol kòn cau tàm Ƀiñ đoàn dê geh bol añ sền gròi ngan. Bol añ neh đơng lam ală kông ty bơh Ƀiñ đoàn pal sền gròi, tơnguh uă bơta niam kung bè ai lài broă lơh pràn broă rơwah cau làng bol kòn cau mŭt lơh kông ñân tàm ală kông ty nàng kơl jăp bè priă geh, rài kis niam ai làng bol in mờ uă bơta broă lơh, gùng dà broă lơh nàng dong kờl làng bol bè broă phan bơna bal mờ phan lơh broă, rơndeh, bơta chài, sơntìl, priă. Lơh sùm broă yal mblàng, lam sồr làng bol lơh broă sa, lơh broă pal geh bơta chài, bơta ngăc ngar”.