Đơs tàm dơ̆ tơn jơh pơrjum, Củ tịc Quốk hội ồng Vương Đình Huệ pà git, tàm pơrjum do, Ủy ban TVQH neh pơgồp jơnau đơs bè ờ uă broă dờng gam geh jơnau đơs ờ ndrờm bal tàm ală rơndăp broă lơh Adăt rơcang gàr dà lơgar; Adăt Sền gàr gơnoar kwơ cau ngui sa (tam gơl); Adăt lơh broă tàm điện tử (tam gơl).

3 rơndăp broă lơh adăt tus tŭ do tơl bơta niam nàng lơh gơs dan geh jơnau đơs bơh Kwang bàng Quốk hội lơh broă tờm. Ủy ƀan TVQH neh pờ tê ring bal Nghị quyết bơto sồr lơh jăt Kơrnoăt pal jăt pơrjum Quốk hội mờ Nghị quyết bè kơnòl, gơnoar bal mờ broă ai lơh bơh Mpồl kwang bàng gơnoar cih. Gơwèt mờ ală broă gơrềng tus ù tiah dơ̆ do neh lơh geh 1 ƀòn dờng, 2 thị xã, 34 sơnah ƀòn, 11 thị trấn mờ geh tơrgùm wơl ù tiah tàm kấp xã gơwèt 10 càr. Củ tịc Quốk hội đơs tờm, do là broă lơh kwơ màng nàng lơh gơs rơndăp broă gơnoar atbồ tàm ală tiah mờ lơh jăt Nghị quyết Dà lơgar bè broă tơnguh bơtàu tiah drà.