Pơn jăt tai broă pơrjum dơ̆ 29, ngai òr (09/01), Ủy ƀan Thường vụ Quốk hội neh pơgồp jơnau đơs bè broă iăt, mblàng lơh loh, lơh wơl 2 rơndăp broă cih Adăt kwơ màng tơnơ̆ mờ hơ̆ tơn jơh dơ̆ pơrjum. Hơ̆ là rơndăp broă cih Adăt ù tiah (tam gơl) mờ Rơndăp broă cih Adăt ală Mpồl ai càn priă (tam gơl). Rơndăp broă cih Adăt Ù tiah (tam gơl) tơnơ̆ mờ tŭ geh iăt, lơh wơl geh 16 tăp mờ 260 bơta. Di lah pơn drờm mờ rơndăp broă cih Adăt yal Ủy ƀan Thường vụ Quốk hội tàm pơrjum đah bàr dơ̆ bơh Pơrjum dơ̆ Prao dê. Di lah pơn drờm mờ rơndăp broă cih Adăt neh sơbì 5 bơta, lơh gơs, lơh wơl, tam gơl 250 bơta.

Tơn jơh pơrjum dơ̆ 29, Củ tịc Quốk hội Vương Đình Huệ sồr ală Ủy ƀan tàm Quốk hội, ală anih lơh broă gơrềng bal pơn jăt tai ai tơngai nàng iăt, lơh wơl rơndăp broă cih Adăt ù tiah (tam gơl); rơndăp broă cih Adăt Ală mpồl ai càn priă (tam gơl); rơndăp broă Nghị quyết bè ờ uă kơrnoăt, broă lơh krơi is nàng bơsong kal ke, gơkòl, lơh mhar broă lơh jăt ală Broă lơh jơnau kờñ dà lơgar mờ ală tơngu me kwơ màng ndai nàng rơcang ai Pơrjum ni sơna dơ̆ 5, Quốk hội khoă XV, sơn đờm lơh tàm ngai 15 nhai 01 tus.