Đơs tàm pơrjum tơn jơh, Củ tịc Quốk hội Vương Đình Huệ sồr, Quốk hội pơn jăt tai ngui nùs nhơm “lơh adăt boh lam rơcang lài, jăt sền geh cồng nha, bơsong di tŭ, pràn bơtàu tơnguh”, nàng bal mờ Cíñ phủ, ală anih lơh broă tàm mpồl cíñ trị lơh geh cồng nha kơnòl bơtàu tơnguh lơh sa mpồl bơtiàn nam 2024 mờ tơngai bơh nam 2021 tus 2025, ai dà lơgar bơtàu tơnguh mhar mờ kơl jăp.

Broă Quốk hội ring bal Adăt ù tiah (tam gơl), neh lơh gơs dùl tàm ală kơnòl lơh adăt boh lam kwơ màng lài ngan bơh tơngai lơh broă Quốk hội khoă XV dê. Quốk hội kung neh ring bal Nghị quyết bè ờ uă gùng dà broă lơh krơi is lơh jăt ală broă lơh jơnau kờñ dà lơgar dê. Jăt Củ tịc Quốk hội Vương Đình Huệ đơs do là broă lơh geh pơn jăt tai cồng nha jăt sền dờng rơlao jơh bè tơngu me do bơh Quốk hội dê tàm pơrjum lài. Quốk hội kung ai tam pà, ngui mờr 64 rơbô tơmàn đong ai ală kơnòl broă, rơndăp broă lơh gơwèt 5 gah broă: sền gàr dà lơgar, lơngăp lơngai, atbồ dà lơgar, khoa họk kông nghệ mờ gùng lòt, tàm hơ̆ ai mờr 58 rơbô tơmàn đong ai 32 rơndăp broă lơh gùng lòt tờm in.