Dơ̆ lòt còp kâp Dà lơgar tus lơgar Việt Nam bơh Tổng Ƀí thư, Củ tịc lơgar Lo Tập Cận Bình dê bal mờ Pơ ùr mờ Mpồl ala măt kwang bàng kâp dờng Đảng, Dà lơgar Lo gơ tơlik uă bơta gơn kơnờm pa tàm gĭt gơ̆p 2 lơgar. Hơ̆ là gơn kơnờm bè dùl “rơndăp nền gùng dà pa”, “gơnoar broă pa” bơh gĭt gơ̆p 2 gah đah Việt Nam mờ Lo dê. Tàm dơ̆ pơrjum, 2 gah kung cribơyai bè broă tơnguh kâp rơndăp nền gùng dà pa ai gĭt gơ̆p 2 gah in, chồl tơnguh lơh broă bal jŏ jòng tơl làm đah 2 lơgar gơ lòt mŭt ngan ngồn tàm uă broă mờ lơh geh cồng nha rlau.

Tàm 20 nam do, Lo là lơgar tam klăc lơh broă bal kă bro dờng ngan rlau jơh bơh Việt Nam dê mờ tŭ do, Việt Nam là lơgar tam klăc lơh broă bal kă bro dờng ngan rlau jơh bơh lơgar Lo dê tàm Asean, lơgar tam klăc lơh broă bal kă bro dờng dơ̆ 4 bơh lơgar Lo dê tàm dunia (tơnơ̆ ală lơgar: Mỹ, Nhờk mờ Hàn Quốc). Priă geh bơh kă bro đah 2 lơgar gơguh 9 dơ̆ bơh khà 20 tơmàn dolar Mỹ tàm nam 2008 gơguh tus mờr 180 tơmàn dolar Mỹ tàm nam 2022. Bơh 15 nam, bơcri priă lơgar Lo dê tàm lơgar Việt Nam gơguh rlau 10 dơ̆ bơh 2 tơmàn dolar Mỹ tàm nam 2008 gơguh tus 25 tơmàn dolar Mỹ tŭ do. Bơta pơnrơ tai tàm gĭt gơ̆p đah Việt Nam mờ Lo là tìp măt lơh kwèng bal đah làng bol 2 lơgar mờ lơh broă bal đah ală tiah. Tus tŭ do neh geh mờr 60 càr mờ ƀòn dờng bơh lơgar Việt Nam dê lơh bơta gĭt gơ̆p lơh broă bal lơh bơyô bal mờ ală tiah bơh lơgar Lo dê. Tàm 10 nhai do, lơgar Việt Nam neh wă rò 1 tơlak 300 rbô nă năc lơgar Lo. Bơta pơgồp bal cribơyai, lơh broă bal đah Việt Nam mờ Lo tàm ală broă bal bơh kơnhoàl ù tiah do mờ dunia dê sùm geh tơnguh tai.