Drim ngai 16/6, tàm Hìu lơh broă Đảng Dà lơgar, Tổng Ƀí thư ồng Nguyễn Phú Trọng đơng lam dơ̆ pơrjum Ƀộ Cíñ trị, Ƀan Ƀí thư tă pơgồp jơnau đơs bè rơndap broă lơh tơn jơh 20 nam lơh jat Nghị quyết sồ 23 NQ/TW, ngai 12/3/2003 bơh Ƀan Cấp hàñ Đảng dà lơgar khoă IX dê bè ngui niam bơta pràn tam klăc dờng jơh gùt mpồl bơtiàn tài làng bol pas gơs, dà lơgar pràn kơl dang, mpồl bơtiàn ring bal, làng bol lơh tờm, ngăc ngar.

Tơnơ̆ iăt Anih lơh broă duh broă sùm Mpồl đơng lam bơt bơtàu rơndap broă lơh yal tơngume rơndap broă lơh dê, Ƀộ Cíñ trị neh cribơyai, ring bal đơs: tàm ală nam do, bơta pràn mpồl tam klăc dờng jơh gùt mpồl bơtiàn sùm geh bơt bơtàu, sơlơ bơtàu tơnguh mờ lơh jat niam, pơgồp bơnah sơlơ bơtàu tơnguh lơh sa- mpồl bơtiàn; sền gàr niam dà lơgar, lơngap lơngai, lơh broă mờ lơgar ndai, sền gròi rài kis phan bơna, nùs nhơm ai làng bol in; bơt bơtàu bơta pin dờn bơh làng bol dê gơwèt mờ Đảng, Dà lơgar. Broă lơh bơt bơtàu, lơh niam wơl Đảng mờ ală Anih lơh broă Cíñ trị geh sền gròi ngan. Tàm dơ̆ pơrjum, Ƀộ Cíñ trị kung đơs nền: mpồl tam klăc dờng jơh gùt mpồl bơtiàn là bơhiàn kwơ ngan, là gùng dà broă lơh dờng màng bơh Đảng, là bơta lơh nền tơl cồng nha tàm broă lơh bơt bơtàu mờ sền gàr dà lơgar. Mpồl tam klăc dờng jơh gùt mpồl bơtiàn jat tàm ală bơta lơh jat niam làng bol lơh tờm xã hội củ nghĩa, sền dờng màng gơnoar kòn bơnus, gơnoar làng bol, lơh jat gơnoar lơh tờm bơh làng bol dê.