Mho ngai 12/12, tàm Hìu lơh broă Củ tịc, Tổng Ƀí thư Nguyễn Phú Trọng neh đơng lam dơ̆ wă rò yŭ rơyùm Tổng Ƀí thư, Củ tịc lơgar Lo Tập Cận Bình jat bơhiàn kâp dờng ngan rlau jơh lời ai kwang atbồ lơgar in. Tơnơ̆ hơ̆, bàr nă kwang đơng lam bồ neh lam lơh pơrjum, bal mờ gơp sền wơl tŭ tơngai bơtàu tơnguh tàm bơta git gơp đah 2 Đảng, 2 dà lơgar, ring bal đơs là, bơta lơh bơyô bal ờs mờng ờ mìng là cau lơh broă bal, mờ gam là oh mi bơh Củ tịc Hồ Chí Minh, Củ tịc Mao Trạch Đông bal mờ ală kwang đơng lam bồ dà lơgar lài do neh să tờm bơt bơtàu gơs mờ tă pơgồp dà kơl hề bơtàu tơnguh, là jơtài kuơmàng ngan bơh làng bol 2 lơgar dê, pal ngai sơlơ tàm pơ dờn mờ bơtàu tơnguh rlau. Bàr gah ring bal bơt bơtàu mpồl bơtiàn tam pà bal tơnơ̆ do Việt Nam – Lo geh gơtha kuơmàng ngan, lơh ngan tài bơta gơboh gơbài bơh làng bol 2 lơgar dê, tài ring lơngai mờ bơta gơguh jak bơh kòn bơnus dunia dê, dipal mờ Sơnoa boh lam Liên hợp quôk mờ adat boh lam dunia, jat kơrnuat ki ngàm bal mờ gơp, lơh broă bal ring bal geh kuơ bal, ki ngàm bơta lơngăp lơngai is, gơnoar tờm mờ tơl làm ù tiah bơh gơp dê, kơ̆ dơn nùs nhơm bơsong bơta ờ ring bal bơh broă lơh ring lơngai. Tơnơ̆ pơrjum kâp dờng, bàr Tổng Ƀí thư neh sền mờ iat yal tơnggit bè 36 sră nggal jơnau ring bal lơh broă bal tàm uă gah broă pa geh kĭ hơ.

Tổng Ƀí thư Nguyễn Phú Trọng neh đềt mềr jà mờ bal mờ Tổng Ƀí thư, Củ tịc lơgar Lo Tập Cận Bình tus bal dơ̆ jà hùc dà ce. Bàr Tổng Ƀí thư bal mờ gơp iat jơnau tơnggit bè ală ce tiơng pơn rơ bơh lơgar Việt Nam dê mờ bơhiàn ờs mờng hùc dà ce krơi is ngan bơh cau Việt Nam dê, mờ kung ai tơnggŏ bơta ndrờm bal bè niam chài đah 2 jơi bơtiàn. Mang dùl ngai bal, Tổng Ƀí thư Nguyễn Phú Trọng, Củ tịc lơgar Võ Văn Thưởng mờ Pơ ùr neh bơyai lơh dơ̆ yờ sa yŭ rơyùm ngan gờm chờ wă rò Tổng Ƀí thư, Củ tịc lơgar Lo Tập Cận Bình mờ Pơ ùr còp kâp dà lơgar tus lơgar Việt Nam.