Tổng Ƀí thư Nguyễn Phú Trọng jờng rơ Thủ tướng lơgar Belarus Roman Golovchenko còp ngan ngồn lơgar Việt Nam mờ gờm chờ lơgar Belarus neh lơh geh cồng nha tàm broă gàr niam bơta kơ̆ kơl jap cíñ trị, bơtàu tơnguh dà lơgar, gàr niam lơngăp lơngai mpồl bơtiàn mờ tơnguh uă gơnoar broă tàm tiah do dê.

Jờng rơ cồng nha niam bơnĕ ngan bơh dơ̆ cribơyai, tìp mat đah Thủ tướng lơgar Belarus mờ ală kwang đơng lam bồ lơgar Việt Nam, Tổng Ƀí thư Nguyễn Phú Trọng jờng rơ uă  ngan ală bơta bơtàu tơnguh niam ngan tàm bơta gĭt gơ̆p đah lơgar Việt Nam mờ Belarus; tơngŏ  bơta  pin dờn dơ̆ lòt còp rơ̆p lơh geh bơta pràn bơtàu tơnguh pa chồl tơnguh bơta gĭt gơ̆p lơh bơyô bal bơh yau mờ lơh broă bal uă bơta đah lơgar Việt Nam mờ Belarus tàm tơngai tus. Tổng Ƀí thư Nguyễn Phú Trọng kung cribơyai mờ Thủ tướng lơgar Belarus bàr pe gùng dà broă lơh, broă lơh dờng nàng kờñ chồl tơnguh bơta gĭt gơ̆p lơh bơyô bơh yau đdah 2 lơgar dê tus gơnoar broă pa, cribơyai bơta mờng chài lơh broă, sơlơ tơnguh lơh broă bal tơl làm. Đảng Kộng sản lơgar Việt Nam rcang bơt bơtàu mờ lơh pràn bơta gĭt gơ̆p lơh broă bal mờ ală đảng Cíñ trị bơh lơgar Belarus dê.