Tàm pơrjum, mờ nùs nhơm song dơ pă, jờng rơ uă ngan kơnòl broă, ală kwang bàng tơrgùm cribơyai, sền sơ wì cồng nha đơng lam lơh jat kơnòl broă ling klàng, sền gàr Dà lơgar mờ bơt bơtàu Đảng ƀộ Mpồl ling klàng nam 2023, đơng lam jơh gùt ling klàng bơsong bơta kal ke, lơh sir tơl làm ală kơnòl broă mờ cồng nha uă rlau mờ nam 2022, uă kơnòl broă lơh sir jak ngan.

Jat tàm ală jơnau mblàng jrô ơnàng ală bơta tàm tiah do mờ tàm dunia, tàm lơgar, Quân ủy Dà lơgar gĭt nền bàr pe kơnòl broă, broă lơh tờm tơrgùm đơng lam, sồr lơh jat geh cồng nha kơnòl broă ling klàng sền gàr Dà lơgar. Tàm hơ̆, pơn jat tai rcang lài gĭt loh, sền sơwì, kờp dŭ lài di bơta, di tŭ cribơyai mờ Đảng, Dà lơgar bơsong geh cồng nha ală bơta gơlik geh, ờ gŏ lời gơtìp rơmơ̆p ndơl, nisơna, sền gàr kơ̆ kơl jăp lơngap lơngai is, gơnoar tờm, tơrgùm dùl, tơl làm kơnhoàl ù tiah bơh Dà lơgar dê. Lơh jat niam gơnoar broă tờm tàm broă bơt bơtàu rài sền gàr Dà lơgar jơh gùt làng bol; pơgồp bal sền gàr Dà lơgar mờ lơh sa, lơh sa mờ sền gàr Dà lơgar mờ broă lơh lơh broă bơh Cíñ phủ dê bè bơtàu tơnguh lơh sa- mpồl bơtiàn, gàr niam lơngăp lơngai Dà lơgar, lơngăp lơngai ală kơnhoàl ù tiah mờ ù tiah tờm kwơ màng; tơrgùm đơng lam bơt bơtàu Đảng bộ Mpồl ling klàng kơ̆ kơl jăp mờ pràn kơl dang.