Thủ tướng Hun Manet tơlik nùs nhơm chờ hờp tŭ bơta git gơ̆p đah lơgar Campuchia mờ lơgar Việt Nam ngai sơlơ geh gơguh mờ bơtàu tơnguh tàm jơh ală gah broă. Ồng Hun Manet yal mờ Tổng Ƀí thư ờ uă bơta tờm bè bơta tàm lơgar Campuchia pa do, tàm hơ̆ geh broă pồ tơl kwang bàng, kwang bàng Quốk hội, Cíñ phủ tơngai lơh broă pa mờ cồng nha Pơrjum dờng ni sơna Đảng CPP kung bè cồng nha bơh dơ̆ Cri bơyai mờ Thủ tướng Phạm Minh Chính.

Bàr gah neh cri bơyai nền nòn bè bơta git gơ̆p lơh broă bal tàm uă gah broă, tàm hơ̆ uă ngan là bơta git gơ̆p đah bàr Đảng, lơh broă bal bè lơh sa, sền gàr dà lơgar-lơngăp lơngai mờ bơta git gơ̆p đah ơruh pơnu bàr lơgar. Tổng Ƀí thư Nguyễn Phú Trọng đơs nền, pe lơgar Việt Nam – Campuchia – Lào tam klăc bal, dong kờl bal sơrlèt mờ ală kal ke, den tàng tàm tơngai pa, bàr gah pal pơn jăt tai prăp gàr, bơtơ̆t bơtàu ai bơta git gơ̆p đah lơgar Việt Nam mờ lơgar Campuchia ngai sơlơ bơtàu tơnguh.