Jat jơnau yal tàm pơrjum, 6 nhai pa do Quân ủy Dà lơgar, Ƀộ Quôk phòng mờ kấp ủy, đơng lam ală kấp neh đơng lam, sồr lơh jơh gùt mpồl ling tam klăc bal, dùl nùs bal, rcang lài bơsong bơta kal ke, lơh sir tơl làm ală kơnòl broă. Tàm hơ̆, pơn rơ ngan là rcang kơlôi sơnơng, đơs di ală bơta, tă pơgồp bal jơnau đơs, dan mờ Đảng, Dà lơgar bơsong geh cồng nha ală bơta gơlik geh, ờ gŏ lời gơ tìp rơmơ̆p ndơl, nisơna, sền gàr kơ̆ kơljap gơnoar tờm kơnhoàl ù tiah bơh Dà lơgar dê.

Lam lơh jat niam ală Nghị quyết bơh Quân ủy Dà lơgar dê bè pơlam tàp, bơto bơtê; bơta chài pơlam tàp, bơto bơtê, pơlam tàp lài, tàm pơrlòng, tàp pràn să jan tàm ală anih lơh broă, mpồl lơh broă mờ ală hìu bơsram geh bơtàu tơnguh. 6 nhai lồi nam, Quân ủy Dà lơgar sền gĭt nền bàr pe kơnòl broă tờm tơrgùm đơng lam, sồr lơh tàm broă lơh ling klàng, sền gàr dà lơgar, tàm hơ̆ pơn jat tai bơt bơtàu Đảng ƀộ Ling klàng pràn kơl dang, kơ̆ kơljap bè cíñ trị bồ tơngoh, nùs nhơm, mpồl cau mờ kwang bàng; Ling klàng pràn kơl dang kơ̆ kơl jap bè cíñ trị. Tơrgùm đơng lam lơh jat ală kơnòl broă tờm tus jơh tơngai lơh broă Pơrjum dờng dơ̆ XIII bơh Đảng dê, ală Nghị quyết, jơnau đơs pơndŭt bè kơnòl broă ling klàng, sền gàr lơngap lơngai dà lơgar tàm bơta pa.