Tàm dơ̆ hòi điện thoại cribơyai, bàr nă kwang đơng lam bồ đơs sùm, do là broă lơh sơnđờm gờm chờ tơngkah kir sơnrai 50 nam ngai lơh bơta gĭt gơ̆p cribơyai broă mờ lơgar ndai đah Việt Nam mờ Nhờk. Jăt mờ hơ̆, bàr nă kwang đơng lam bồ dùl nùs ring bal bè broă kờñ bal bàr gah pơgồp bal lam lơh niam ală broă lơh tơngkah kir sơnrai nàng kờñ lơh geh bơta tam klăc bal, tơnguh tai bơta gĭt gơ̆p lơh broă bal tàm jơh ală gah broă, ai bơta gĭt gơ̆p đah bàr lơgar dê bơtàu tơnguh rlau tai, cèng wơl bơta kwơ ngan ngồn ai làng bol bàr lơgar in. Tổng Ƀí thư ồng Nguyễn Phú Trọng đơs nền, Việt Nam kơ̆ nùs gùng dà lơh broă mờ lơgar ndai krơi is, rơcăng lơh tờm is, ring lơngai, lơh bơyô bal, lơh broă bal mờ bơtàu tơnguh, lơh uă bơta gĭt gơ̆p cribơyai broă mờ lơgar ndai mờ uă lơgar, lơh bơyô mờ uă lơgar; rơcăng lài, jơh nùs mŭt gơrờm bal mờ dunia tơl ală bơta, jrô ơnàng làm uă; Việt Nam là lơgar lơh broă bal pin dờn mờ là lơgar tàm mpồl jơh nùs mờ geh kơnòl tàm mpồl bơtiàn dunia. Tàm hơ̆, lơgar Nhờk là lơgar lơh broă bal kwơmàng khà dùl bơh Việt Nam dê.