Tơngkah kir sơn rai 93 nam Ngai crơng gơs Đảng Kộng sản Việt Nam (03/02/1930-03/02/2023), drim ngai 06/2, tàm Hìu lơh broă Đảng Dà lơgar, bơh bơta đơng lam bơh Tổng Ƀí thư ồng Nguyễn Phú Trọng dê, Ƀộ Cíñ trị, Ƀan Ƀí thư bơyai lơh dơ̆ tìp mat rềp mềl bồ nam pa Qúy Mão 2023 mờ ală kwang đơng lam bồ kấp dờng lài do bơh Đảng, Dà lơgar, Mặt trận Dà lơgar Việt Nam, ală kwang bàng lài do là Ủy viên Đảng Dà lơgar ală khoă bơh ală rài.

Đơs tàm dơ̆ tìp mat, Tổng Ƀí thư ồng Nguyễn Phú Trọng đơs sùm tàm tơngai gam uă kal ke, bơta lòng, kwang đơng lam bồ Đảng, Dà lơgar neh sùm tam klăc bal, dùl nùs bal, pơgồp bal niam, bơceh pa nàng geh ală broă lơh kràñ cê jơh nùs di pal, di tŭ, di pal nàng đơng lam, sồr lơh jơh gùt Đảng, gùt làng bol mờ gùt ling klàng neh lơh geh ală cồng nha kwơ màng, tơl làm đau ală jơnau kờñ, kơnòl broă neh geh ai. Tổng Ƀí thư ồng Nguyễn Phú Trọng tơngŏ bơta kơ̆p kờñ, tơngai tus ală kwang đơng lam bồ Đảng Dà lơgar lài do mờ nùs nhơm jơh nùs geh lài mờ ală bơta mờng chài kwơ màng bơh he dê, jat tơl ală bơta tơl nă cau dê rơ̆p pơn jat tai geh ală tă pơgồp bal bơta pràn mờ tă pơgồp bal gơwèt broă lơh kăc màng pơn rơ ngan bơh Đảng, Dà lơgar mờ làng bol dê.