Mho ngai 21/02 tàm Hìu duh broă Đảng Dà lơgar dê, Tổng Ƀí thư ồng Nguyễn Phú Trọng neh wă rò Mpồl kwang bàng kâp dờng ala măt Đảng Srơh đah kiau Tơrgùm dùl (MIU) bơh Tổng Ƀí thư ồng Mighen Mehia, Ƀộ trưởng Gùng dà broă lơh mŭt gơrờm bal kơnhoàl ù tiah do lơgar Kộng hoà Dominica dê lam bồ gam còp mờ lơh broă tàm Việt Nam bơh ngai 18/02 tus ngai 26/02 nam 2023. Tàm dơ̆ wă rò, Tổng Ƀí thư ồng Nguyễn Phú Trọng đơs nền, Đảng, Dà lơgar Việt Nam sùm sền dờng màng bơta gĭt gơ̆p lơh bơyô bal, lơh broă bal uă bơta mờ ală lơgar, ală đảng geh bơta gĭt gơ̆p ờs mờng bơh yau, tàm hơ̆ geh lơgar Kộng hoà Dominica mờ Đảng MIU. Tổng Ƀí thư ồng Nguyễn Phú Trọng jờng rơ bơta gĭt gơ̆p lơh broă bal niam bơnĕ ngan mờ ngai sơlơ geh cồng nha đah Đảng Kộng sản Việt Nam mờ Đảng MIU mờ ală đảng cíñ trị kwơmàng ndai tàm lơgar Kộng hoà Dominica dê. Tổng Ƀí thư sồr bàr gah pơn jăt tai pơgồp bal jơh nùs, lam lơh geh cồng nha ală broă rơndăp lơh lơh broă bal đah bàr đảng. Tổng Ƀí thư ồng Mighen Mehia đơs sùm jăt tàm bơta gĭt gơ̆p cíñ trị niam bơnĕ là cơng tàng ngan ngồn mờ bơta ƀươn nàng bàr lơgar in rề ơnàng mờ mŭt lơh ngan ngồn rlau ală gah broă lơh broă bal đah bàr lơgar.