Tổng Ƀí thư ồng Nguyễn Phú Trọng jờng rơ, đơs niam ngan bơta kwơ dơ̆ lòt còp lơgar Việt Nam bơh Thượng tướng ồng Alvera Lopez Miera dê tàm tŭ tơngai bàr lơgar rơcăng tơngkah kir sơnrai 50 nam ồng Phidel Castro, Kwang đơng lam bồ dà lơgar Cuba lòt còp tiah tơngklàs tàm càr Quảng Trị; tơlik nùs nhơm pin dờn dơ̆ lòt còp rơ̆p pơgồp bơnah lơh pràn kơldang mờ lơh jrô ơnàng rlau tai gĭt gơ̆p lơh bơyô bal ờs mờng bơh yau krơi is ngan đah bàr Đảng, bàr Dà lơgar mờ mpồl ling 2 lơgar dê.

Tổng Ƀí thư ồng Nguyễn Phú Trọng đơs nền, lơgar Việt Nam rơ̆p lơh ngan jơh pràn he dê tàm bơta geh mờ bơta tơl pràn bơh lơgar Việt Nam dê nàng dong lơgar Cuba jăt nùs nhơm “Tài Cuba, Việt Nam rơ̆p pơnđơl pràn uă ngan rlau jơh tàm bơta tơl pràn bơh he dê nàng dong lơgar Cuba sơrlèt gan ală kal ke, bơta lòng ing tềng đăp măt”. Tổng Ƀí thư jờng rơ ngan gơnoar broă kwơmàng mờ ală cồng nha tàm broă lơh broă bal sền gàr dà lơgar đah 2 lơgar; sồr 2 gah sơlơ lơh broă bal dipal mờ bơta geh ngan, geh cồng nha, dipal mờ bơta kwơ bơh tơl lơgar dê, tài ring lơngai mờ bơtàu tơnguh tàm kơnhoàl ù tiah do mờ tàm dunia.