Tàm dơ̆ wă rò, Tổng Ƀí thư ồng Nguyễn Phú Trọng đơs nền, Đảng, Dà lơgar mờ làng bol Việt Nam sùm kơp kờñ sơlơ tơnguh tai bơta git gơp lơh broă bal 2 gah mờ Mông Cổ, là lơgar bơyô ờs mờng ngai sơlơ bơtàu tơnguh ngan ngồn rlau tàm ală gah broă, dipal mờ bơta kuơ, bơta pràn mờ jơnau kờñ bơh 2 lơgar dê. Tổng Ƀí thư ồng Nguyễn Phú Trọng ai lơh pin dờn dơ̆ lòt còp Việt Nam bơh ồng Ukhnaagiin Khurelsukh dê rơp pơgồp bơnah sơlơ chồl pràn rlau tai bơta git gơp lơh bơyô bal ờs mờng đah 2 lơgar, kuơmàng là tàm tŭ tơngai 2 lơgar gam bal mờ gơp wèt tus tơngkah kir sơnrai 70 nam ngai lơh bơta git gơp cribơyai broă mờ lơgar ndai Việt Nam – Mông Cổ tàm nam 2024.

Mho ngai 01/11, tơnơ̆ dơ̆ cribơyai, Củ tịc lơgar ồng Võ Văn Thưởng mờ Kwang atbồ lơgar Mông Cổ neh tìp mat mờ cau lơh ƀăo, yal bè cồng nha dơ̆ cribơyai.

Jat tàm ală bơta gĭt gơ̆p lơh bơyô bal bơh yau niam bơnĕ, Củ tịc lơgar đơs là, tàm tơngai tus, bơta gĭt gơ̆p đah lơgar Việt Nam mờ Mông Cổ rơ̆p pơn jat tai geh bơt bơtàu, bơtàu tơnguh wèt tus lơh geh tơngume bơta gĭt gơ̆p pa. Đơs tàm dơ̆ pơrjum ƀăo, Củ tịc lơgar ồng Võ Văn Thưởng jờng rơ, bơta gĭt gơ̆p mờ lơh broă bal bơh yau đah 2 lơgar Việt Nam mờ Mông Cổ gam bơtàu tơnguh niam bơnĕ, lơh geh uă cồng nha pa tàm tơngai pa do, ngan là ală cồng nha tàm gah cíñ trị, sền gàr Dà lơgar, lơngăp lơngai mờ lơh sa. Nàng ai bơta gĭt gơ̆p 2 lơgar dê bơtàu tơnguh jrô ơnàng làm uă, geh mut lơh ngan ngồn mờ geh cồng nha rlau tai tàm tơngai tus, Củ tịc lơgar pà gĭt neh ring bal mờ Kwang atbồ lơgar Mông Cổ uă broă lơh kwơ màng, tàm hơ̆ ring bal chồl tơnguh jơnau kờñ tơnguh uă rlau 2 dơ̆ priă lơh geh bơh kă bro phan mờ lơgar ndai đah 2 gah gơguh tus khà 200 tơlak dolar Mỹ tàm ală nam tus. Lài hơ̆, Củ tịc lơgar ồng Võ Văn Thưởng mờ Kwang atbồ lơgar Mông Cổ neh kĭ hơ ală sră nggal lơh broă bal đah ală Ƀộ, ngàñ 2 lơgar dê.