Tàm dơ̆ wă rò, Tổng Ƀí thư ồng Nguyễn Phú Trọng đơs nền Việt Nam sùm dong kờl broă lơh bơt bơtàu mờ bơtàu tơnguh dà lơgar Campuchia mờ pin dờn, Campuchia rơp pơn jat tai ai geh ală cồng nha pa, dờng màng, tơl làm rlau tai tàm broă lơh jat Kơrnuat bơh Đảng CPP dê tơngai bơh nam 2023 tus nam 2028 mờ Broă rơndap lơh bơh Cíñ phủ khoă VII dê ai tơlik. Tổng Ƀí thư sồr 2 gah lam lơh jat geh cồng nha dơ̆ tìp mat đah Kwang đơng lam bồ kâp dờng 2 Đảng mờ dơ̆ tìp mat đah 3 kwang atbồ bơh 3 đảng Việt Nam- Campuchia mờ Lào dê; pơn jat tai tam gơl pa broă lơh bal đah 2 đảng nàng kờñ lơh jat jơnau sồr bơh bơta pa dê. Jat hơ̆, pơn jat tai sền bơta git gơp cíñ trị là tờm, ai tơlik lài gùng dà bal ai git gơp 2 lơgar in; lơh kơ̆ kơljap lơh broă bal sền gàr dà lơgar, sền gàr lơngăp lơngai; sơlơ tơnguh rlau tai lơh broă bal tàm broă lơh broă mờ lơgar ndai; lơh gơlik bơta tam gơl pa, tơnguh cồng nha tàm lơh broă bal lơh sa, niam chài, bơto bơsram, khoa họk kỹ thuật mờ sơlơ tơnguh tìp mat lơh kwèng làng bol.