Dơ̆ tus còp geh kwơ màng ngan, là broă lơh mùl màl jăt gùng dà broă lơh bal mờ lơgar ndai bơh Pơrjum dờng Đảng dơ̆ XIII dê, pơgồp bal tàm broă lơh pràn nùs nhơm tam klăc bal đah ală lơgar tàm mpồl ASEAN, ai tơngŏ gùng dà broă lơh bal mờ lơgar ndai lài kung bè tơnơ̆ lơgar Việt Nam dê sền kwơ bơta git gơ̆p rềp bal, lơh bơyô bal mờ Tam klăc bal jŏ jòng mờ lơgar Malaysia.

Bơh tŭ bàr gah tơnguh kâp git gơ̆p tus Tam klăc bal jŏ jòng tàm nam 2015, khà priă kă bro phan 2 lơgar gơguh bơh 8 tơmàn dolar Mỹ tàm nam 2014 gơguh rơlao 14 tơmàn dolar Mỹ tàm nam 2022 mờ wèt tus khà priă geh bal đah bàr lơgar geh 18 tơmàn dolar Mỹ tàm tơngai tus. Dơ̆ tus còp geh bơyai lơh lài mờ tŭ tơnkah 10 nam git gơ̆p Tam klăc bal jŏ jòng, Tổng Ƀí thư ồng Tô Lâm kờp dŭ rơ̆p bal mờ ală kwang đơng lam bồ lơgar Malaysia cri bơyai bè bơta tàm dunia, tàm tiah do, kơlôi sơnơng jrô cri bơyai, ai geh ală gùng dà broă lơh dờng nàng lơh pràn bơta git gơ̆p đah bàr lơgar gơguh tàm bơta pa, kơ̆ kơl jăp, mùl màl mờ geh cồng nha rơlao tàm tơngai tus.