Tàm ală ngai do, jơnau yal bè dơ̆ tơrluh ù pràn 5 đồ richter gơlik geh tàm klo ngai, ngai 28/7 neh gơbàn rơnggô pràn ngan geh làng bol tàm yal mờ gơp. Làng bol neh yal wơl ală bơta git gŏ he dê, mờ kung geh ală jơnau đơs krơi is tŭ sền gŏ broă gơlik geh. Bi Y Phiếu, làng bol tàm ƀòn Rô Xia, xã Đăk Tăng đơs: “Añ ntoat dô bơdìh lài ngan mờ tơnơ̆ hơ̆ lòt jòi kòn añ dê. Làng bol bơh sơn rờp kung rơngòt sơl tài gơ pràn ir, mơya tơnơ̆ tŭ tàm pơn dờm pơnđiang gơp, pơlam gơp in den làng bol neh bè ờs wơl”.

Tơnơ̆ tŭ gơlik geh tơrluh ù, ală ngai do, gơnoar atbồ, mpồl cau ală xã bơh kơnhoàl Kon Plông, càr Kon Tum dê neh sồr kwang bàng tus tơl thôn, ƀòn sền sơ wì broă bơta geh ngan, mờ kung tơngkah làng bol drơng dilah pơn jat tai geh tơrluh ù gơlik geh. Ồng Nguyễn Văn Bay, Củ tịc Anih duh broă làng bol xã Đăk Tăng pà git, kơnờm yal di tŭ den tàng làng bol tàm 11 ƀòn tàm xã neh pleh nùs tồr rơngòt bè dơ̆ tơrluh ù: “Tơnơ̆ tŭ gơlik geh tơrluh ù dờng tàm ngai 28/7, tềng đap bơta đơng lam bơh Anih duh broă làng bol kơnhoàl dê, xã neh lơh ală mpồl lơh broă, hòi jà ală oh mi geh mờng chài tàm broă mblàng yal, hòi jà mờ lòt sền sơ wì bơta geh ngan tàm ală thôn tàm xã. Mờ kung rơpua nùs nhơm làng bol, pơn jat tai mblàng yal, hòi jà làng bol iang nùs lơh sa”.

Drơng mờ tơrluh ù, tơngai lài, Viện vật lý điạ kầu neh pơgồp bal mờ gơnoar atbồ kơnhoàl Kon Plong lam lơh uă dơ̆ bơto pơlam jơnau git wă, bơta chài làng bol in. Kơnờm bè hơ̆ mờ uă ngan làng bol tàm ală xã tiah klŏ tơrluh ù bè Đăk Tăng, Đăk Nên, Đăk Ring, Măng Bút, Ngọc Tem… ndrờm geh jơnau git wă mờ bơta chài drơng mờ tơrluh ù. Oh Nguyễn Bỉnh Khiêm ơm tàm thôn Vi Xây, xã Đăk Tăng pà git ală broă pal lơh dilah gơlik geh tơrluh ù nàng sền gàr să tờm mờ ală cau ndai: “Tŭ sau lòt bơsram den neh geh ală pơgru tàm hìu bơsram mờ ală broă lơh tàm xã, thôn mblàng yal bè bơta chài drơng mờ tơrluh ù. Dilah gơlik geh tơrluh ù den he pồn hơ đơm rồm kơ ƀàng halà hơ đơm rồm jơ nờng nàng pleh ală phan halà rơkàng hìu digơlan tơrlơm nàng sền gàr màng kis he dê”.

Ai oh Y Vỹ, kung ơm tàm xã Đăk Tăng den pà git broă lơh geh kuơ ngan he dê, nàng kờñ dong làng bol in git bè bơta chài drơng mờ tơrluh ù: “Kung geh cau git sơl, mơya ală cau kra den geh cau git, geh cau den ờ git. Sau kung yal khi in git là he pồn hơ đơm rồm kơƀàng mờ ntoat dô hờ tiah ha pah nàng ờ gơtìp aniai să tờm he in”.

Bơh nhai 4 nam 2021 tus tŭ do, tàm kơnhoàl Kon Plông, càr Kon Tum neh gơlik geh mờr 800 dơ̆ tơrluh ù mờ jat jơnau đơs bơh Viện Vật lý điạ kầu dê, do là tơrluh ù gơ chul tài broă dơng dà bơh ală tơnau dà hìu măi pờ tơlik ồs đèng dà lơh gơbàn. Tàm 2 ngai pa do, tềng đap bơta tơrluh ù gơlik geh nisơna mờ khà gơlik geh tàm pơn jat sùm uă dơ̆, pràn ngan rlau jơh bơh lài tus tŭ do, ồng Lê Đức Tín, Phó Củ tịc Anih duh broă làng bol kơnhoàl Kon Plông pà git, jơnau đơs bơh kơnhoàl dê nàng drơng mờ ờ lơh rơngòt tàm broă drơng mờ tơrluh ù: “Bol hi pơn jat tai ngui sră nggal bơh Viện Vật lý điạ kầu dê geh wil tơl tơngume nàng pơlam tai làng bol drơng tàm tơl broă gơlik geh. Sồr ală xã lam lơh mblàng yal, hòi jà, bơto bơtê jơnau git wă tus tơl thôn, ƀòn, tơl hìu bơnhă làng bol nàng git mờ geh bơta chài drơng niam rlau. Lam lơh pơlam tàp tus tiah tờm klŏ tơrluh ù hơ̆ sồng tơnơ̆ hơ̆ lam lơh tàm ală thôn ndai tàm kơnhoàl. Bơh hơ̆ dong Mpồl đơng lam tàm ală xã geh mờng chài tŭ gơlik geh rơnggô ù”.

Jơnau yal bơh Anbih tờm yal tơnggit tơrluh ù mờ đơs lài nsừc dờng dà lềng – Viện Vật lý điạ kầu ai gŏ, tàm 2 ngai, 28 mờ 29/7 neh gơlik geh 46 dơ̆ tơrluh ù mờ klŏ tơrluh ù tàm tiah kơnhoàl Kon Plông, càr Kon Tum. Mùl màl ai gŏ, bơdìh mờ dơ̆ tơrluh ù pràn 5 đồ richter gơlik geh tàm klo ngai, ngai 28/7 lơh gơbàn rơnggô tàm uă tiah den ală dơ̆ tơrluh ù gam wơl làng bol ờ git gŏ bơta rơnggô lơi tơnơ̆ hơ̆. Jơnau gơ lời wơl bơh tơrluh ù dê kung ờ hềt lơh gơbàn hoàc huơr uă bè phan bơna. Gơnoar atbồ mờ làng bol tàm tiah klŏ tơrluh ù kơnhoàl Kon Plông, càr Kon Tum gam pơn jat tai drơng mờ broă gơlik geh nisơna bơh tơrluh ù dê.