Ngan là, pah nhai, ală mpồl lơh broă Ồs đèng tàm càr ndrờm geh jơnau cih mờ video sùm geh gơrềng tus broă lơh lơngap lơngai ồs đèng, pơnđàng tàm website gah ồs đèng kung bè ală ƀăo, anih pờ tơlik jơnau đơs Dà lơgar mờ ală tiah; lơh pờ tơlik jơnau đơs mblàng yal lơngăp lơngai ồs đèng tàm ală xã, sơnah ƀòn bơh 2 tus 4 dơ̆ pah nhai.

Bơh tàm mạng xã hội Zalo mờ facebook, Ồs đèng càr Dăk Lăk kung lơh broă mblàng yal, bơto pơlam ngui ồs đèng lơngăp lơngai mờ tềm pềr tus gĭt nđờ jơ̆t rbô nă cau ngui in. Mờ broă lơh mblàng yal lơngăp lơngai ồs đèng mờ rlau 62 rơbô nơm pơ àr mblàng yal, mpồl lơh broă neh lơh rềp mềr nàng làng bol in ƀuơn wă mờ ngui.

Bơh nhai 10 nam 2023, tus bal ală mpồl lòt sền ală gah bè broă lơh rcang sơndră mờ crùh ồs sa, Ồs đèng càr Dăk Lăk neh pơgồp bal mblàng yal lơngăp lơngai ồs đèng tus ală mpồl cau, cau dùl nă să, nàng kờñ tơrmù uă ngan bơta pơhìn gơlik geh ồs sa, bơrtoh tài bơh tam tŭp đèng tàm broă lơh sa, kă bro.