Dơ̆ tơrlah ù gơlik geh tŭ mìu dờng jŏ jòng uă jơ tàm mang ngai 28/6 neh lơh dùl gah taluy jơnhua mờr 20 thơk tàm gùng dềt 36, gùng Hoàng Hoa Thám, sơnah ƀòn 10, ƀòn dờng Dà Làc gơtìp tơrlah tàm tŭ 2, 3 jơ drim ngai 29/6. Dơ̆ tơrlah do lơh 2 nơm hìu gơtìp chồl lik bơh anih sơn rờp, ù lŭ tơrlah bồr uă cau. Jat bi Lưu Xuân Đua, bơr tơu bơh ală cau gơtìp aniai dê, 2 nă cau gơtìp bồr là ùr bơklau ƀòn tờm tàm kơnhoàl Phú Hòa, càr Phú Yên, bal mờ 10 nă cau ndai bơh càr Phú Yên tus Dà Làc nàng lơh kông ñân bơt bơtàu. Tŭ bơta aniai gơlik geh, mìng geh 2 nă ùr bơklau bic tàm tual tang. Rlau 10 nă kông ñân ndai bic tàm broă lơh rềp hơ̆ tơn den tàng bơtuah klàs bơh bơta aniai.

Tơnơ̆ tŭ bơta aniai gơlik geh, mpồl lơh broă geh gơnoar càr Lâm Đồng neh geh mat tàm tiah gơlik geh broă do mhar lam lơh broă lơh dong kờl rềs àr. Geh 5 nă cau geh dong klàs di tŭ tàm gơnru tơrlah mờ jun lòt hìu sơnơm nàng sơm.