Là dùl tàm ală cau lam lài tàm broă ròng sềm bar bèt tàm càr Dăk Lăk, ồng  Bùi Văn Thức, ơm tàm thị trấn Phước An, kơnhoàl Krông Pách, càr Dăk Lăk chờ hờp bơh jơnau yal Nghị địñ thư bè jơnau sồr gròi sền, sền sơwì mờ sàng goh gah ròng phan gơwèt mờ rơsòn sềm bar bèt tăc bơh lơgar Việt Nam tus lơgar Lo geh mut ngui ngan ngồn. Jat ồng, bulah drà kă bro tàm lơgar niam ngan, mơya broă rơsòn sềm bar bèt geh tăc mờ lơgar Lo jat sră blơi uă pờ tơlik tŭ tơngai niam ngan bè drà kă bro dunia, giă tăc rơ̆p “gơguh” rlau, lơh geh priă cồng uă rlau tai sơl. Ồng  Bùi Văn Thức, đơs: “Dăk Lăk là càr geh ală bơta ù tiah ƀuơn ngan, di pal nàng ròng uă tiah ròng sềm bar bèt, bơta bơkah rơsòn sềm bar bèt uă. Tàm 10 nam rê wơl hờ ndo den ròng sềm bar bèt neh gơ gơs dùl broă lơh, uă cau geh priă lơh geh uă bơh ròng sềm bar bèt, den dilah geh tơl ală bơta nàng tăc mờ lơgar ndai den ngan là giă tăc jơnhoa rlau, priă lơh geh rơ̆p uă rlau tai sơl”.

         Ală mpồl lơh sa kă bro lơh gơlik tăc sềm bar bèt mờ lơgar ndai tàm càr Dăk Lăk kung neh lơh sir ală bơta jat jơnau sồr lơgar blơi phan bơh lơgar ndai nàng wă rò tŭ tơngai niam. Mò Phạm Thị Phương Dung, cau tờm dùl mpồl lơh sa kă bro tàm kơnhoàl Krông Pách, pà gĭt: Tŭ geh jơnau yal rơsòn sềm bar bèr Việt Nam geh tăc tus lơgar Lo mờ sră blơi uă, kông ty neh sơnđờm mut lơh tơn tàm broă lơh sră nggal phan bơna, rề ơnàng lơh hìu lơh broă, tiah ơn prap phan, lơh bal mờ ală cau ròng sềm bar bèt tàm ù tiah do dê nàng kờñ rcang lài phan bơna ai drà kă bro in. Tus tŭ do, yến sào Thành Dung là dùl tàm 4 mpồl lơh sa kă bro bơh lơgar Việt Nam geh tăc tus lơgar Lo jat sră blơi uă. Mò Phạm Thị Phương Dung, đơs:“Bol añ neh lơh sir jơh ală sră nggal tăc bơnah phan sềm bar bèt sơnrờp tus lơgar Lo. Bè jŏ jòng bol añ kờñ jơh ală mpồl lơh sa kă bro neh geh tăc sềm bar bèt mờ lơgar ndai pơgồp bal wơl bal mờ gơ̆p lơh geh măt kă bro yến sào Việt Nam, bal mờ gơ̆p wèt tus rài tơnơ̆ do lơh ai phan bơna sềm bar bèt lơgar Việt Nam dê geh niam rlau tai”.

Jat ồng Phạm Văn Hậu, Củ tịc Mpồl yến sào càr Dăk Lăk pà gĭt, bơta ƀuơn bơta pràn ròng uă sềm bar bèt tàm càr là uă ngan. Bơta bơkah niam bơh rơsòn sềm bar bèt bơh càr Dăk Lăk dê geh đơs niam ngan mìng tơnơ̆ sềm bar bèt bồt. Nàng lơh geh ală jơnau sồr tăc sềm bar bèt mờ lơgar ndai, Mpồl yến sào Dăk Lăk rơ̆p pơn jat tai dong kờl ală cau tàm mpồl kung bè ală cau tờm ròng sềm bar bèt tơnguh uă bơta gĭt wă, bơcri priă lơh ngui măi mok pa nàng cèng wơl bơta bơkah sềm bar bèt niam ngan rlau jơh. Bal mờ hơ̆, Mpồl rơ̆p tàm tơrbŏ bal mờ anih ròng sềm bar bèt bal mờ mpồl lơh sa kă bro nàng tus bal tàm ală anih lơh bal nàng dong tơnguh uă bơta kwơ phan bơna dê. Ồng Phạm Văn Hậu đơs: “Mpồl pơn jờng làng bol pal ròng uă jat gùng dà kơ̆ kơl jăp. Mờr tus Mpồl rơ̆p bơyai lơh dùl dơ̆ cribơyai lơh bal mờ ală anih ròng tăc phan, jà ală mpồl lơh sa kă bro tăc phan mờ lơgar ndai khi rơ̆p bơto pơlam làng bol in broă lơh mờ hìu ròng sềm bar bèt, kung bè adat tŭ lòt jat anih lơh bal. Atbồ geh khà kờñ blơi phan den bơta bơkah niam tăc phan bơna bơh sơnrờp geh gròi sền gàr tơl bơta bơkah niam bơh rơsòn sềm bar bèt dê”.

Jơh gùt càr Dăk Lăk tŭ do geh rlau 1 rơbô hìu bơnhă ròng sềm bar bèt, mờ pơgap 1 rơbô 300 hìu ròng sềm bar bèt tơrgùm uă tàm ƀòn dờng Buôn Ma Thuột mờ ală kơnhoàl Ea Kar, Ea Súp, Krông Pách... Càr Dăk Lăk là càr lam lài tàm tiah Tây Nguyên mờ tàm top 10 càr, ƀòn dờng geh khà hìu ròng sềm bar bèt dờng ngan rlau jơh gùt lơgar dê. Khà rơsòn sềm bar bèt bơh càr dê kờp dŭ lơh geh bơh 10 tus 12 tấn dùl nam, geh tus pơgap 6,6% khà lơh geh bơh gùt lơgar dê. Tus tơngai tŭ do, càr Dăk Lăk neh rcang tơl làm ală bơta, kơ̆p anih lơh broă geh gơnoar lòt sền, sền sơwì nàng ai phan bơna yến sào Dăk Lăk mut tàm drà kă bro tơmàn làng bol mờ broă lơh jat sră blơi uă.

Bal mờ hơ̆, Hội đồng Ñân zân càr Dăk Lăk neh ai lơh jat Nghị quyết sồr tiah ờ geh gơnoar ròng, tiah ròng sềm bar bèt, broă dong kờl ntrờn anih ròng sềm bar bèt lik bơh tiah ờ geh gơnoar ròng tàm ù tiah càr Dăk Lăk dê. Jơnau sồr nàng kờñ tam gơl bơta làng bol bơcri priă lơh hìu ròng sềm bar bèt li la uă tàm tiah geh gal làng bol ơm kis mờ ngui măi sóng âm pơn jồ sềm bar bèt lơh gơ rềng tus làng bol gùt dar. Mơkung kơ̆p kờñ ală kấp, ală ngàñ, ală tiah tàm càr lam lơh jat gùng dà broă lơh do dùl bă kràñ cê jơh nùs, lơh jơh nàng kờñ lơh geh wơl bơta rơndăp tăp sèng phan ròng đơs bal, ròng sềm bar bèt đơs is, ờ gŏ lời broă lơh hìu ròng sềm bar bèt tàm tiah geh gal làng bol ơm kis gơrềng tus rài kis bơh làng bol dê bè jŏ jòng.