3 nam lài, gŏ drà kă bro ù tiah hìu đam duh hồl, ùr bơklau bi Nguyễn Xuân Nguyên, sơnah ƀòn Tân Lợi, ƀòn dờng Buôn Ma Thuột neh geh tŭ geh priă cồng uă ngan bơh broă tac bro ù tiah hìu đam. Tàm tơngai mờ giă ù gơguh kas, geh nhai bàr nă ùr bơklau geh priă cồng 2, 3 tơmàn đông bơh broă blơi ù tiah hìu đam nàng tac tơn tàm ală tiah ngài tiah tờm ƀòn dờng. Kơp kờñ lơh geh tai priă cồng, bi leng càn priă bơh cau tờm, lơh sră ai hìu đam, rơndeh oto… lòt càn priă ngân hàng nđờ tơmàn tai nàng blơi ù. Mơya bơh lồi nam 2022, drà kă bro ù tiah hìu đam gơmù mhar ngan, uă ngan bă ù mờ bi Nguyên blơi neh gơ kòl wơl, ờ gơtùi tac.

Rlau 1 nam do, ùr bơklau bi pal lơh ngan nàng tơm priă cồng bơnah priă càn he dê: “Tŭ do, ùr bơklau añ lơh geh kàr lơi pal tơrgùm nàng tơm priă cồng ngân hàng in jơh, rlau 45 tơlak đông dùl nhai, kal ke ngan. Bol hi lơh tơl bơta nàng kờñ tac yòm ù, tơrmù ƀà hoàc huơr mơya ờ gơtùi tac. Giă tac neh gơmù bơh 30 tus 40% pơndrờm mờ tŭ blơi mơya kung ờ geh cau lùp blơi sơl. Dilah tàm tơngai giă ù gơguh kas den ală bă ù do pơnđàng yal tơnggit là geh cau blơi mơ. Ờ hềt git tus tŭ lơi den drà kă bro ù tiah hìu đam hơ̆ sồng gơ rê bè ờs wơl nàng tac, ai dilah sùm tơm priă cồng bè do ngan là ờ jai tai”.

Bi Huỳnh Thanh Tâm, cau uă ngan lơh broă lơh kòn gùng tac ù tiah hìu đan tàm ƀòn dờng Buôn Ma Thuột pà git, tàm tơngai giă ù gơguh kas tàm lồi nam 2021 tus nggùl nam 2022, pah nhai bi yal tơnggit tac bro geh bơh 10 tus 12 bă ù, priă lơh geh git nđờ rhiang tơlak đông. Bulah bè hơ̆, bơh lồi nam 2022 tus tŭ do, pah nhai mìng tac geh 2, 3 bă, gơmù bơh 80 tus 90% khà ù, priă cồng sa bơh yal tơnggit tac ù kung gơmù sơl. Bi Tâm pà git: “Tŭ do khà cau blơi ù tiah hìu đam gơmù uă ngan, pah nhai añ mìng tac geh bơh 2 tus 3 bă ù halà uă nhai mìng tac geh 1 bă gời. Bè añ tac bro yòm dùl êt là gam bơtuah, tài añ geh mat cau blơi is, gam uă cau ờ gơtùi tac. Ù ơm lài do tac tàm tơngai giă gơguh kas pơgap 1 tơmàn đông dùl bă, ai tŭ do gơmù gam pơgap 600 tơlak halà geh tŭ geh uă bă ù gam gơmù lơyah rlau tai. Jat bơta geh ngan tŭ do neh giă ù neh gơmù lơyah ngan, jat añ kờp dŭ den pal 2 nam tai den hơ̆ sồng giă ù tiah hìu đam gơ rê bè ờs wơl, tŭ do den mìng lơh dùl êt lơm gời”.

Ờ mìng ală cau bơcri priă dềt, rah rài mờ drà kă bro ù tàm tiah ngài, ù tiah hìu đam tàm ală tiah lơh rơndap broă lơh kuơmàng Buôn Ma Thuột kung ờ geh bơta lơi krơi. Jat ồng Ngô Đình Vạn, Kwang atbồ Kông ty ù tiah hìu đam Lộc Sơn Hà mờ Sky Vi, do là kông ty tac ală bơta ù tiah hìu đam dờng màng tàm ală rơndap broă lơh ƀòn dờng kơphe, rơndap broă lơh Eco City mờ tiah drà Ân Phú… Kông ty neh pal tơrmù tus 75% cau lơh broă tài drà kă bro ndrờm bè ờ geh tơn. Bơh mờr 100 nă cau lơh broă, priă lơh geh rlau 90 tơmàn đông pah nam, tŭ do, cau lơh broă mìng gam ờ hềt tus 20 nă, priă lơh geh tàm nam 2023 mìng gam hơ đơm 20 tơmàn đông. Ồng Vạn kơp kơnờm bơta do rơp geh tam gơl tàm nam 2024 do, tŭ làng bol lơh broă sa tàm càr sùm tơnhàu phan geh uă mờ priă cồng càn bơh ngân hàng dê gơmù lơyah: “Tơngai ờs mờng pơgap mờ do 1 nam, làng bol cèng priă pơyua tàm ngân hàng uă ngan tài priă cồng pơyua jơnhua bơh 8 tus 11%, mơya tŭ do gơmù gam bơh 4 tus 5% mờ làng bol gơtùi tă priă he dê. Bè hơ̆ den tă priă nàng lơh ñchi, jat añ den khi rơp wơl blơi ù tiah hìu đam tài giă ù ờ gơguh mờ dipal nàng blơi ù. Bơdìh hơ̆ tai, broă lơh sa Dăk Lăk dê gam bơtàu tơnguh niam, gùng rơndeh ntoat mhar, logistic gam geh lơh, lơh gơs ù tiah bơtàu tơnguh mờ gah ù tiah hìu đam kung geh kuơ, mờ uă cau bơcri priă sền gròi. Ờ hềt kờp là giă sầu riêng, kơphe gơguh jơnhua mờ uă cau pas rlau, mờ tŭ hơ̆ khi geh priă den khi rơp wơl bơcri nàng blơi ù tiah hìu đam wơl”.

Nam 2023 – 2024, priă lơh geh bơh tờm chi sa plai mờ chi tam jŏ nam tờm ngan bơh càr Dăk Lăk dê bè sầu riêng, tiêu gơguh jơnhua rlau dùl dơ̆ mờ nggùl tus 2 dơ̆ pơn drờm mờ nam 2022, mờ khà gơguh kờp dŭ rlau 15 rbô tơmàn đông. Bal mờ hơ̆ là priă cồng ai càn ngân hàng gam gơmù uă, ală cau bơcri priă ù tiah hìu đam tàm càr gơtùi kơp kờñ tàm ală bơta tam gơl bơh drà kă bro dê. Bulah bè hơ̆, mùl màl Dăk Lăk kung gam là càr rƀah. Mờ jơnau kờñ bal mờ priă jền tàm càr, rơp kal ke ngan nàng bơtàu tơnguh drà kă bro mờ khà hìu ù uă ngan neh geh blơi tơrgùm, prap bơh lài.