Pơn jăt tai pơrjum dơ̆ 06, Hội đồng Ñân zân càr Dăk Nông khoă IV ngai 06/07 cribơyai broă bơtàu tơnguh lơh sa- mpồl bơtiàn. Củ tịc Ủy ƀan Ñân zân càr Dăk Nông ồng Hồ Văn Mười hơ bàr pe jơnau lùp bơh cau tĕ khà mờ kwang bàng Hội đồng Ñân zân càr dê sền gròi, ngan là lùp uă tàm broă lơh rơndăp ù tiah bauxite, ù tiah.

Hơ jơnau lùp bơh cau tĕ khà mờ kwang bàng Hội đồng Ñân zân càr Dăk Nông dê, ồng Hồ Văn Mười đơs 7 broă tờm, pal sền ngăc ngan tàm bơtàu tơnguh lơh sa- mpồl bơtiàn bơh càr dê tàm 6 nhai bồ nam mờ tơngai tus dê. Tàm hơ̆, broă bauxite neh geh uă kwang bàng Hội đồng Ñân zân càr lùp tàm dơ̆ pơrjum. Củ tịc Ủy ƀan Ñân zân càr Dăk Nông pà gĭt, jăt lòt sền pa ngan rlau jơh, khà bauxite bơh càr Dăk Nông dê geh tus 60% gùt lơgar, là bơta kwơ bơta ƀươn bơh càr dê. Mơya bơta geh ngan tŭ do gam kal ke wơl ngan, gơkòl ngan. Tus tŭ do kung gam ờ hềt geh tam gơl sơl den tàng 1062 rơndăp broă lơh bơh càr dê gơtìp rơndăp rơndồl bal mờ rơndăp ù tiah bauxite, tàm bă ù gơguh tus mờr 6 rbô 700 lồ. Bơta do gơlam tus jơh ală jơnau dan jơnau sồr bơcri priă tàm ù tiah càr Dăk Nông pal ơm ing tĕ, gơrềng ờ niam tus bơta tơl pràn gơhòi gơ jà bơcri priă.

Ngai 6/7, tàm dơ̆ hơ jơnau lùp sơn rờp tàm Pơrjum dơ̆ 13, khoă XII, tơngai lơh broă bơh nam 2021-2026 bơh Hội đồng Ñân zân càr Gia Lai dê, ală kwang bàng neh tơrgùm lùp uă broă kal ke tàm gah bơt bơtàu tàm ală tiah. Tàm hơ̆, broă ală homestay, hìu kwơ̆ lơh tìs mờ kơrnoat boh lam mờ lơyài lơh sir ală bơta rơndap ù tiah tàm ală tiah tàm càr dê, lơh gơ gơs bơta kơryan dờng ngan gơwèt mờ bơta bơtàu tơnguh mờ lam lơh ală rơndap broă lơh bơcri priă.

Hơ jơnau lùp bơh kwang bàng dê bè kơnòl broă bơh anih lơh broă atbồ tàm broă lơh uă homestay, tiah ơm rlô, anih tăc kơphê lơh tìs mờ kơrnoat boh lam, ồng Nguyễn Bá Thạch- Kwang atbồ Sở Bơt bơtàu càr Gia Lai dê đơs là, broă lơh atbồ dà lơgar bè rơndap tap sèng bơt bơtàu tàm uă tiah tàm càr dê geh bơta at bồ ờ pràn; tŭ broă lơh tìs mờ kơrnoat boh lam neh lơh sir hơ̆ sồng sền gŏ, gơ lam tus kal ke bơsong; bơta gĭt wă, lơh jat bơh làng bol dê ờ hềt uă, uă cau gĭt tìs mơya kơldang nùs lơh tìs, lơh kal ke, jŏ jòng tơngai lơh glài mờ priă lời gam geh broă lơh tìs mờ kơrnoat boh lam.

Drà ù tiah hìu đam mờr bè “ờ lơh broă tai” mơya gam lơh duh hồl pơrjum dơ̆ 05, Hội đồng Ñân zân càr Kon Tum khoă XII. Uă kwang bàng tơlik nùs nhơm kơlôi rơcăng bơta do rơ̆p lơh gơrềng uă tus priă lùp dồs kes priă bơh càr dê tàm nam do. 6 nhai bồ nam do, priă lùp dồs priă dia bơh priă ngui ù bơh càr Kon Tum dê kờp dŭ lùp geh 90 tơmàn đong, mìng geh 22,5% lơ̆p pơndrờm mờ kờp dŭ lài.

Tàm dơ̆ cribơyai, kwang bàng Hội đồng Ñân zân càr, Ƀí thư Thàñ ủy ƀòn dờng Kon Tum ồng Nguyễn Đức Tuy pà gĭt, bơh tŭ do tus lồi nam digơlan kung gam sơl là bơta lòng, priă lùp dồs priă dia bơh ù tiah hìu đam digơlan kung gam gơmù uă sơl. Nàng tă bơsong bơta gơkòl ai drà ù tiah hìu đam in geh sùm priă lùp dồs kes priă dà lơgar in, lơh geh bơta gơn kơnờm ai ală gah lơh broă geh gơrềng in, jơnau đơs bơh uă kwang bàng Hội đồng Ñân zân càr Kon Tum dê đơs là, pal tam gơl giă ù di tŭ jăt bơta gơlik geh tàm drà; di tŭ, ring bal tàm broă lơh rơndăp ù tiah; tă bơsong geh bơta gơkòl tàm tŭ lơh jăt kơrnoăt boh lam bè ù tiah.